هێزه‌ ته‌ناهییه‌كان خۆپێشانده‌رانی به‌غدا گولـله‌باران ده‌كه‌ن

:: PM:03:22:04/10/2019 ‌

دوای نیوه‌ڕۆی ئه‌مڕۆ هه‌ینی له‌گه‌ڵ به‌رده‌وامی خۆپێشاندانه‌كان و هه‌وڵه‌كانی حكوومه‌ت به‌ بڵاوه‌پێكردنی زۆرترین هێزی ته‌ناهی له‌ شاره‌كان، جارێكی تر خۆپێشانده‌ران له‌ به‌غدا به‌ فره‌وان ده‌ستیان به‌ ناڕه‌زایی ده‌ربڕین كرده‌وه‌ و هێزه‌ ته‌ناهییه‌كانیش به‌ گولـله‌ی زیندوو وه‌ڵامی خۆپێشانده‌ران ده‌ده‌نه‌وه‌ و پێشبینی ده‌كرێ ئه‌م هه‌نگاوه‌یش ڕێژه‌ی قوربانیان زۆر زیاد بكات.

به‌ گوێره‌ی زانیارییه‌كان له‌ میدیاكانی عێراق بڵاوبووه‌ته‌وه‌، خۆپێشانده‌رانی به‌غدا به‌ چڕی ده‌ستیان به‌ چالاكی و جموجۆڵ كردووه‌ته‌وه‌ و به‌رده‌وامن له‌ ناڕه‌زایی ده‌ربڕین، سه‌ره‌ڕای ئه‌وه‌ی له‌ دوێنێوه‌ قه‌ده‌غه‌ی هاتوچۆ ڕاگه‌یه‌نراوه‌ و هێلی ئینته‌رنێتیش له‌ پارێزگاكانی باشوور و ناوه‌ڕاست بڕدراون، به‌ڵام تا ئێسته‌ حكوومه‌ت نه‌یتوانیوه‌ به‌سه‌ر ئه‌و دۆخه‌ زاڵ بێ و خۆپێشانده‌ران سوورن له‌سه‌ر به‌رده‌وامیدان به‌ ناڕه‌زایه‌تییه‌كان.

سه‌رچاوه‌كان له‌ به‌غدا دووپات له‌وه‌ ده‌كه‌نه‌وه‌ كه‌ له‌ ناوه‌ڕاستی به‌غدا و له‌و شوێنانه‌ی كه‌ خۆپێشانده‌ران لێی گردبوونه‌ته‌وه‌، هێزه‌كانی ته‌ناهی بۆ بڵاوه‌پێكردنیان ده‌ستیان كردووه‌ به‌ ته‌قه‌كردن و به‌ گولـله‌ی زیندوو ڕووبه‌ڕووی خۆپێشانده‌ران ده‌بنه‌وه‌، ئه‌مه‌یش هێنده‌ی تر خه‌ڵكی تووڕه‌ كردووه‌ و جۆش و خرۆشی زیاتری دروست كردووه‌ و ڕقی به‌رانبه‌ر حكوومه‌تیش زۆر زیاتر كردووه‌.

له‌ ئه‌نجامی سێ ڕۆژی خۆپێشاندانی به‌غدا و شاره‌كانی تری عێراق، تا ئێسته‌ 44 كه‌س كوژراون و نزیكه‌ی هه‌زار و 200 كه‌سیش برینداربوون و 276 كه‌سیش له‌لایه‌ن هێزه‌كانی ته‌ناهییه‌وه‌ گیراون و خراونه‌ته‌ گرتووخانه‌كانه‌وه.




وشە - باز ئه‌حمه‌د

ئه‌م بابه‌ته 2844 جار خوێنراوه‌ته‌وه‌‌