هەركە قسە لەسەر جۆرج ئۆڕوێڵ دەكرێت، یەكسەر رۆمانەكانی "1984" و "كێڵگەی ئاژەڵان" دێتە خەیاڵ، چونكە ئەم دوو رۆمانە زیاتر لەوەی خەیاڵی دەكەیت، ناوبانگیان هەیە و هەر ئەوانەن چانسێكی گەورەیان بە جۆرج ئۆڕوێڵ داوە تا بەم شێوەیەی ئێستە لەسەر ئاستی دنیا بناسرێت.
هەردوو رۆمانی "1984" و "كێڵگەی ئاژەڵان" لە بواری سیاسەت گرنگن، یەكێكیان بە تەكنیك و خەیاڵێكی سەرنجڕاكێش رەخنە لە دەسەڵاتی شیوعییەت و هەموو رژێمە خۆسەپێنەكانی هاوشێوەی دەگرێت. ئەویتریشیان كە رۆمانی "باخچەی ئاژەڵان"ـە باس لە دزینی شۆڕش دەكات.
ئەم دوو رۆمانە تەنیا لە رووی ئەدەبییەوە گرنگ نین، بەڵكو لە رووی سیاسیشەوە گرنگن، چونكە كۆمەڵێك تێڕوانینی نوێ بە هزری سیاسی مرۆڤایەتی دەدەن و وا دەكەن چیتر مرۆڤ تێگەیشتنی ساویلكانەی بۆ چەمكەكانی "شۆڕش" و "دەسەڵات" نەبێت.
رۆمانی "كچی قەشەكە" بەر لە رۆمانی 1984 و كێڵگەی ئاژەڵان نووسراوە. ئەگەر یەكێك ئەم دوو رۆمانەی پێشتر خوێندبێتەوە و دواتر لە رووی تەكنیك و نووسینەوە بە رۆمانی كچە قەشەكە بەراوردیان بكات، بە ئاشكرا بۆی دەردەكەوێت، توانای راستەقینەی جۆرج ئۆڕوێڵ هێشتا لە كچە قەشەكە بەدەرنەكەوتووە.
لەگەڵ ئەوەیشدا نابێ لە خوێندنەوەی ئەم رۆمانە بێ ئومێد بین، چونكە خوێندنەوەی رۆمانەكە گرنگییەكەی لە چەند خاڵێك دەردەكەوێت.
یەكێك لەو خاڵانە ئەوەیە جۆرج ئۆڕوێڵ (لە ساڵی 1903 لە دایك بووە و لە 1950 مردووە)، لەم رۆمانەدا بەپێچەوانەی ئەوانەی پێشوو، سەرنج لە سیاسەت و دەسەڵات نادات، بەڵكو دزێوییەكانی كۆمەڵگە دەردەخات.
جیا لەمەیش رۆمانەكە باس لە قۆناغێكی مێژوویی دەكات كە نیوەی یەكەمی سەدەی بیستەمە و تێیدا باوەڕە باوەكانی كۆمەڵگە هێشتا كاریگەرییان بەسەر خەڵكەوە ماوە، لە بەرانبەریشدا بیروڕای نوێ دەركەوتوون، وەك بیروباوەڕی شیوعییەت و ئیلحاد و چەندان بیرۆكەی تری نوێبوونەوە.
دۆرۆسی /28 ساڵ/ پاڵەوانی سەرەكی رۆمانەكەیە، كچی قەشەیەكە لە شارۆكەیەك لەگەڵ باوكی دەژی. دۆرۆسی باوەڕێكی قووڵی بە مەسیحییەت هەیە، هەموو كاتەكانی بۆ خزمەتی باوك و كەنیسە و خەڵكی نەدار و پەككەوتە و منداڵی شارۆكەكە تەرخان كردووە.
ئەو كچە كە تۆزێك جوان و سەرنجڕاكێشە، هەمیشە لەژێر گوشارێكی دەروونیدایە، زۆربەی كێشەكانیشی پێوەندی بەخۆپەرستی باوكییەوە هەیە.
باوكی كە سەرمایەدارە و پشكی لە بۆرسەدا هەیە، ئامادە نییە پارەی تەواو بخاتە بەردەستی كچەكەی تا خەرجی ماڵەوەی پێ بكات، لەگەڵ ئەوەشدا گوشاری بۆ دێنێ بۆ ئەوەی چاكترین خواردنی بۆ ئامادە بكات. تەنانەت باوكە قەشەكە گوێ بەوە نادات كچەكەی چۆن كەوتووەتە ژێر تانە و تەشەری دووكاندارانی شارۆكەكەوە، رۆژانە بەهۆی قەرزەوە یەخەی دەگرن.
دۆرۆسی چەندان جار هەوڵ دەدات باوكی لەو مەینەتییانەی ئاگەدار بكاتەوە، بەڵام ئەو پیاوە لە قرچۆكییەكەی پاشگەز نابێتەوە. لەوكاتەدا ئەو كچە رێككەوتی پیاوێك دەكات كە پێشتر ناسیویەتی بەناوی "واربرتۆن".
ئەم پیاوە كەسێكە بێ باوەڕ و مێبازە، سەرسامی دۆرۆسییە. وێڕای ئەوەی چەندان هەڵسوكەوتی پێچەوانەی كچە قەشەكەیە، بەڵام ئەو سەردانی دەكات و هاوڕێیەتی قبووڵ دەكات، تەنانەت كار دەگاتە ئەوەی گێچەڵی سێكسی پێ دەكات، بەڵام لەگەڵ ئەوەشدا هەستێكی بۆ دۆرۆسی هەیە و تەنانەت رێزیشی بۆ دەنوێنێ.
شەوێك كە لە ماڵی ئەو پیاوە دەگەڕێتەوە و لەژێر گوشاری بیركردنەوە لە قەرزەكان، كچی قەشە تووشی لەدەستدانی یادەوەری دەبێت و دواجار لە نیوەشەودا شارۆكەكەی بەجێدەهێڵی. لێرەدا رووبەڕووی كەسانی سەرشەقام دەبێت و وەك ئەوان سواڵ دەكات و لە كێڵگەی حەشیش كار دەكات، لەم ماوەیەیش رۆژنامەكان هەواڵەكە بەمشێوەیە بڵاو دەكەنەوە، گوایە "كچی قەشە لەگەڵ كەسێكی بێ باوەڕ رای كردووە".
دواجار دۆرۆسی یادەوەری بۆ دەگەڕێتەوە و لە رێی خزمێكیەوە دەبێتە مامۆستا لە لەندەن. لە ماوەی وێڵبوونی دۆرۆسی، جۆرج ئۆڕوێڵ وێنەیەكی زۆر روونمان لەبارەی كۆمەڵگەی بەریتانیی ئەو سەردەمە پێ دەدات. هەر لە بارودۆخی كەنیسە و كاسبكار و پەروەردەوە، بگرە تا دەگاتە باری نەداری خەڵك و نزمی ئاستی گوزەرانی خەڵك و دواكەوتووییمان بۆ دەردەخات.
جۆرج ئۆڕوێڵ لەم رۆمانەدا دەڵێ: مرۆڤ لە چینە نزمەكانی كۆمەڵگە ناتوانێ بۆ چەند خولەكێكیش بیر بكاتەوە