هێزی سووریای دیموكرات: شه‌ڕ به‌رده‌وامه‌ و توركیا زیانی زۆری به‌ركه‌وتووه‌

:: PM:07:30:08/11/2019 ‌
ئه‌ندامێكی نوێنه‌رایه‌تی باكوور و ڕۆژهه‌ڵاتی سووریا ڕای ده‌گه‌یه‌نێت، توركیا به‌رده‌وامه‌ له‌ هێرشكردن و پابه‌ندی هیچ كام له‌ ڕێككه‌وتنه‌كانی له‌گه‌ڵ ئه‌مه‌ریكا و ڕووسیا نابێت و ده‌شڵێت، زیانێكی زۆر به‌ر سووپا و هێزی سه‌ر به‌ توركیا كه‌وتووه‌.

توركیا به‌رده‌وامه‌ له‌ هێرشكردن بۆ سه‌ر ناوچه‌كانی سنووری سه‌رێكانی
ئه‌مڕۆ هه‌ینی هه‌شتی تشرینی دووه‌م، مه‌سعوود حه‌سۆ، ئه‌ندامی نوێنه‌رایه‌تی باكوور و ڕۆژهه‌ڵاتی سووریا به‌ "وشه‌"ی ڕاگه‌یاند، له‌ ڕۆژئاوای كوردستان ئه‌مڕۆ شه‌ر به‌رده‌وامی هه‌بووه‌ و تا ئێسته‌یش به‌رده‌وامه‌ و له‌ سه‌رێكانی و گونده‌كانی ده‌وروبه‌ری شه‌ر هه‌یه‌ و توركیا به‌رده‌وامه‌ له‌ هێرشكردن بۆ سه‌ر ناوچه‌كانی سنوری سه‌رێكانی.

زیاتر گوتى، توركیا له‌ سه‌ره‌تاوه‌ پابه‌ندی دوو ڕێككه‌وتنه‌كانی نێوان ئه‌مه‌ریكا و ڕووسیا نه‌بووه‌ كه‌ مانگی ڕابردوو ئه‌نجامیدراون و ئێسته‌یش پێشێلكاری ده‌كات و هێرش و بۆردومانه‌كانی بۆ ڕۆژئاوا به‌رده‌وامه‌.

ڕوونى كرده‌وه‌، له‌ هێرشه‌كانیدا توركیا به‌رده‌وام زیانی پێده‌گات و ئه‌مڕۆیش له سنووری سه‌رێكانی زیانێكی زۆر به‌ر سوپای توركیا و كه‌وتووه‌ و كوژراوێكی زۆریان هه‌یه‌ و له‌ هێزه‌كانی سووریای دیموكرات شه‌هید و بریندار هه‌یه‌، به‌ڵام ئه‌و زیانه‌ی به‌ر توركیا كه‌وتووه‌ زۆر زیاتره‌ له‌ هێزه‌كانی سووریای دیموكرات.

هه‌روه‌ها گوتی، توركیا زیاتر بۆردومانه‌كانی به‌ فرۆكه‌ ئه‌نجام ده‌دات و له‌ هێرشه‌كانیشدا توشی شكست و زیان ده‌بێت.

سلێمانی/ هۆشیار عه‌لی


وشە - محەمەد میران

ئه‌م بابه‌ته 103 جار خوێنراوه‌ته‌وه‌‌