لیستی دابەشەكردنی مووچە ڕاگەیەنرا

:: PM:02:15:25/02/2020 ‌
بڕیارە سبەی مووچەی چەند شوێنێك دابەش  بكرێت و تا ئێستەیش پارەكەی بەغدا نەگەیشتووە.

ئەمڕۆ سێشەم 25ـی شوبات، سەرچاوەیەك لە وەزارەتی دارایی و ئابووری حكوومەتی هەرێمی كوردستان بە "وشە"ـی ڕاگەیاند، سبەی مووچەی دەستەی وەبەرهێنان، دەستەی دەسپاكی، دەستەی مافی مرۆڤ، دەزگای ژینگە، دەستەی ناوچە كوردستانیەكانی دەرەوەی هەرێم، كۆمسۆنی باڵای هەڵبژاردن دابەش دەكرێت.

ئەو سەرچاوەیە گوتی، تا ئێستە پارەكەی بەغدا نەگەیەشتووە بە وەزارەتی دارایی.

لە ناوەڕاستی هەر مانگێك عێراق بڕی 452 ملیار دینار بۆ هەرێمی كوردستان دەنێرێت
هەرێمی كوردستان بۆ دابەشكردنی مووچەی فەرمانبەران، دوای تەنگژەی دارایی پشت بە فرۆشتنی نەوت و ئەو بڕە پارەیەی لە بەغداوە بەپێی ڕێككەوتنێك بۆ هەرێمی كوردستان دێتە ناردن، دەبەستێت.

بەپێی ڕێككەوتنی نێوان هەرێمی كوردستان و عێراق، لە ناوەڕاستی هەر مانگێك عێراق بڕی 452 ملیار دینار بۆ هەرێمی كوردستان دەنێرێت و بە داهاتی ناوخۆیی و پارەی هاوپەیمانان بۆ پێشمەرگە و فرۆشتنی نەوت مووچەی فەرمانبەران دەدرێت.

لە سەرەتای ئەمساڵ پاشەكەوتی مووچە لەسەر فەرمانبەرانی هەرێمی كوردستان هەڵگیرا و پێدانی مووچە ئاسایی بووەتەوە. لە پێنجی سەرەتای هەر مانگێك لە هەرێمی كوردستان مووچە دابەش دەكرێت.



وشە - رامیار جەواد

ئه‌م بابه‌ته 26727 جار خوێنراوه‌ته‌وه‌‌