حه‌یات ده‌خیل موراد ناسیار ب دالیا كچه شێوه‌كارا ئێزیدی كو وه‌ك ئاواره ل كومه‌لگه‌ها شاریا یا سه‌ر ب ده‌ڤه‌رداریا سێمێلێ دژیت، ده‌مه‌كه ده‌ست ب كارێن هونه‌ری كرییه، ب رێیا تابلویێن خوه شیایه ئێش و ژانێن كومه‌لكوژییا شنگاڵێ و ده‌نگێ ئێزیدی بۆ جیهانێ بده‌ت نیاسین، د نوكه دا كار بۆ پڕۆژه‌یه‌كێ دكه‌ت ل بارا كومكوژیا شنگالێ.
ئه‌گه‌ر ده‌ستپێكێ خوه بده‌ی نیاسین؟
ئه‌ز حه‌یات ده‌خیل موراد ناسیار ب دالیا، ل سالا 1996 ژ دایك بوویمه و خه‌لكا ده‌ڤه‌را شنگالێ مه و نوكه وه‌ك ئاواره ل كومه‌لگه‌ها شاریا یا سه‌ر ب ده‌ڤه‌رداریا سێمێلێ دژیم، ده‌رچویا كولیژا بنیات و پشكا زمانێ ئێنگلیزی یا زانكۆیا دهۆكێ مه، كارێ هونه‌ری دكه‌م و هه‌تا نوكه من خێزان پێكنه‌ئینایه.
هه‌تا نوكه ژی ل سه‌ر كارێن هونه‌ری به‌رده‌وامم
چه‌ند ساله هاتیه ناڤا هونه‌ری و چ جورێ هونه‌ری دكه‌ی؟
هه‌رچه‌نده هه‌ر ژ زاروكینی من حه‌زا كارێ هونه‌رێ شێوه‌كاری هه‌بوویه، به‌لێ ب شێوه‌یه‌كێ گشتی ل سالا 2019 من ده‌ست ب كارێ هونه‌ری كرییه، ئه‌ڤه زێده‌باری ئه‌ز ده‌رچوویا چ پشكێن هونه‌ری نیمه، به‌لكو ب حه‌ز و ئاره‌زوو و كاركرنا به‌رده‌وام ل سه‌ر هونه‌رێ شێوه‌كاری فێر بوویمه، هه‌تا نوكه ژی ل سه‌ر كارێن هونه‌ری به‌رده‌وامم.
تو دخوازی ب رێیا تابلویێن خوه چ په‌یامێ بگه‌هینی؟
ئه‌ز دخوازم ب رێیا تابلویێن خوه یێن شێوه‌كاری ئێش و ژان و ئه‌و سته‌ما ب سه‌رێ ئێزیدی و شنگالێ هاتی نیشانی جیهانێ بده‌م، دده‌ما بوری دا من هژماره‌كا زۆر یا تابلویان چێكرینه و به‌لاڤكرینه، ژبلی ڤێ یه‌كێ هه‌ڤده‌م هونه‌ر تشته‌كه و دكه‌ڤیته سه‌ر هزر و مێشكێ مرۆڤی له‌وا هه‌ر تشتێ من دڤێت بكه‌م دشێم ب رێیا هونه‌ری ده‌رببرم.
دده‌ما بوری دا ته چ به‌رهه‌مێن خوه به‌لاڤكرینه؟
ل ده‌ستپێكا سالا 2020 من پێشانگه‌هه‌كا شێوه‌كاری ڤه‌كرییه و تێدا هژماره‌كا زۆر یا تابلویێن خوه نیشاندان، سوپاسیا سه‌رۆكێ پشكا زمانێ ئینگلیزی یا كولیژا بنیات دكه‌م كو هاریكارییا من كری، دیسان سوپاسییا خێزانا خوه دكه‌م كو هه‌رده‌م پالپشت و پشته‌ڤانیا من دكه‌ن داكو ئه‌ز به‌رده‌وام بم.
پڕۆژه و كارێن ته‌یێن ئاینده دێ چ بن؟
هه‌كه هاریكاری بۆ من بهێته‌كرن، من گه‌له‌ك پڕۆژه و هزرێن جوان هه‌نه، نوكه كار ل سه‌ر پڕۆژه‌یه‌كێ بۆ كومه‌لكوژییا شنگالێ دكه‌م، كو تێدا سته‌مه‌كا زۆر ژلایێ داعش ب سه‌رێ ئێزیدییان هاتیه.
دهۆك / نه‌وزاد هلۆری