نرخی نەوت لە بازاڕەكانی دنیا لە بەرزبوونەوەدایە و بەرزترین نرخی لەوەتەی 11ی ئادارەوە تۆمار كرد. بەهای نەوتی برێنت بەراورد بە مانگی رابردوو زیاتر لە دوو هێندە بەرز بووەتەوە.
لە سەرەتای ئەم هەفتەیەی بازاڕی بۆرسەوە هاوشێوەی سێ هەفتەی رابردوو نرخی نەوت رووی لە بەرزبوونەوە كردووە و چاوەڕوان دەكرێ ئەم هەفتەیەش نرخی نەوت زیاتر بەرز ببێتەوە.
بەگوێرەی
dailyfx ئەمڕۆ پێنجشەم، نرخی هەر بەرمیلێك لە نەوتی برێنت بە 36 دۆلار و 56 سەنت دەفرۆشرێت كە بەرزترین نرخە لە 70 رۆژی رابردوو تۆمار كرابێت. هاوكات نەوتی جۆری ئەمەریكی ناسراو بە wti بە 34 دۆلار و 30 سەنت دەفرۆشرێت.
مانگی رابردوو نزمترین ئاستی مێژوویی تۆمار كردبوو
نرخی نەوت لە كاتێكدا رووی لە هەڵكشان كردووە كە مانگی رابردوو نزمترین ئاستی مێژوویی تۆمار كردبوو، تەنانەت نەوتی جۆری ئەمەریكا بۆ سفر دابەزیبوو و فرۆشیاران پارەیەكیشیان دەدا بە كڕیار تا نەوتەكە لە كۆگاكاندا بگوازێتەوە.
ئەگەر زۆربوونی بەرهەمهێنان لە رابردوودا و كەمبوونەوەی داخوازی بە هۆی كاریگەرییەكانی كۆرۆنا، گرنگترین هۆكاری دابەزینی نرخی نەوت بووبێت، ئەوا ئێستە كەمكردنەوەی بەرهەمهێنان لە لایەك و دووبارە لابردنی رێوشوێنەكانی دژ بە كۆرۆنا و كرانەوەی بازاڕەكان، بە هۆكاری سەرەكی بەرزبوونەوەی نرخی نەوت هەژمار دەكرێت.
لە سەرەتای ئەم مانگەوە وڵاتانی بەرهەمهێنەری نەوت دەستیان بە جێبەجێكردنی ئەو رێككەوتنە كردووە كە مانگی رابردوو واژوویان كرد، بڕیاریان دا بە رێژەیەكی بەرچاو لە بەرهەمهێنانی نەوت كەم بكەنەوە.