"وتارەكەی سەرۆكی حكوومەت پیلانی چەند لایەنێكی پووچەڵ كردەوە"

:: PM:07:44:23/05/2020 ‌

دوای وتارە واقیعبینییەكەی مەسروور بارزانی، سەرۆكی حكوومەتی هەرێم، بۆچوونی زۆرینەی شارەزا و خەڵك بەو ئاراستەیەیە كە ئەو دۆخی راستەقینەی هەرێمی، بەتایبەتی لە رووی ئابوورییەوە، بۆ خەڵك شی كردەوە، پلانی تۆكمەیشی بۆ دەربازبوون خستە روو، د رێبوار بابەكەیی، ئەندامی فراكسیۆنی پارتی لە پەرلەمانی كوردستان، دەڵێت، وتارەكە پیلانی بەشێك لە هێز و لایەنە سیاسییەكانی بۆ شكاندنی حكوومەتی هەرێم پووچەڵ كردەوە.
شەو و رۆژی خستووەتە سەر یەك بۆ دابینكردنی مووچە و خزمەتگوزارییەكان بۆ هاووڵاتییانی خۆی
بابكەیی، كە سەرۆكی لیژنەی پێوەندییەكانی دەرەوەی پەرلەمانە، بۆ "وشە"، روونی دەكاتەوە، لەو وتارەی سەرۆكی حكوومەتی هەرێمی كوردستان دەردەكەوێت، كە سەرقاڵی پلانێكی زۆر تۆكمەن، بەشێكی بریتییە لە جێبەجێكردنی چاكسازی، بەشێكیشیان پێداچوونەوەیە بە سیستمی وەزیفی لە هەرێم، دیارە سەرۆكی حكوومەت تەنیا لە خەمی ئەوەدا نییە مووچە دابین بكات، كە وەك خۆی باسی كرد، ئەركی دەوڵەتداری تەنیا دابینكردنی مووچە نییە، هاووڵاتی ئەگەر مووچەی هەبێت، بەڵام كارەبا و ئاوی نەبێت، ناتوانین بڵین دابینكردنی مووچە بە تەنیا پێوەری سەركەوتنی حكوومەتە.

زیاتر گوتی، ئەوەی سەرۆكی حكوومەتی هەرێم بیری لێ دەكاتەوە، فرەوانترە، لە باشتركردنی خزمەتگوزارییەكان و چارەسەركردنی دۆخی دارایی بە دابینكردنی مووچەی فەرمانبەران، ئەوەی ئەو بیری لێ دەكاتەوە، زۆر گەورەترە لەوانەی خۆیان خزاندووەتە ناو داواكاریی مووچەخۆران، دواكەوتنی مووچە هۆكاری بابەتی لەپشتە، واتە ئەوە نییە كە حكوومەت پارەی هەیە و دابەشی ناكات، بەڵكو چەند هۆكارێك هەن، لەوانە داڕمانی نرخی نەوت و كەمبوونەوەی داهاتی ناوخۆیی و پەتای كۆرۆنا و وەستانی ئەو بڕە پارەی بەغدا دەینارد.

ئاماژەی كرد، سەرۆكی حكوومەتی هەرێم بیانووی ئەو هێز و لایەنانەی بڕی كە دەیانەوێ دواكەوتنی مووچە بقۆزنەوە، كاتێك داوایان لێ دەكات بە كردەنی بێن و بەیەكەوە خەریكی داڕشتنی پلان و ستراتیجیەتێك بن بۆ چارەسەركردنی دۆخەكە، لەلایەكی تر لە بابەتی لامەركەزیەت، تەرحێكی زۆر گونجاوی خستە روو كە وەك حكوومەت لاریان نییە لە جێبەجێكردنی لامەركەزیەتی ئیداری، بە مەرجێك یاساكانی هەرێم و بنەماكانی فیدراڵی هەرێم بگونجێت و نەبێتە هۆی دەستكاریكردنی قەوارەی هەرێم، بۆیە برادەرانی ئەولا، فەرموون با بێنە پێشەوە و بە دەنگدانی پەرلەمانی كوردستان جێبەجێ بكرێت.

"ئەو وتارە لە رووی ناوەڕۆكەوە، هەموو پیلانی هێز و لایەنە سیاسییەكانی بۆ شكاندنی حكوومەتی هەرێم گرتوویانەتە بەر، ئەوانەی لە دەسەڵاتن و ئەوانەیشی لە ئۆپۆزسیۆنن، پووچەڵ دەكاتەوە، ئەوانەی لە دەسەڵاتن داوایان لێ دەكات پاڵپشت بن، بۆ ستراتیجیەتی حكوومەت و دەیانخاتە ژێر باری بەرپرسیارەتی، وەرن ئێمە هاوبەشین و بەیەكەوە چارەسەری دۆخەكە بكەین، ئەوانەیشی لە ئۆپۆزسیۆنن، پێیان دەڵێت ئەركی ئێوە چاودێریكردنی حكوومەتە، بۆیە چاودێری ئێمە بكەن لە جێبەجێكردنی پلانەكە، ئەگەر پێشنیازیشتان هەیە پێشكەیشی بكەن، بەڵام بەربەستمان بۆ دروست مەكەن لە جێبەجێكردنی پلانەكەمان"، بابكەیی وای گوت.

ئەو پەرلەمانتار و مامۆستای زانكۆیە دووپاتی كردەوە، وتارێكی لەجێی خۆی بوو و هەموو ئەو گریان و شینەی ئەو هێز و لایەنانەی بەناونیشانی دابینكردنی مووچە دەیانگێڕا، هەموو ئەو پیلان و رێكلامە سیاسییەی ئەوانەی پووچەڵ كردەوە، داوای لێ كردن كردەنیانە بیر بكەنەوە، بێنە پێشەوە، چونكە چاكسازی بە درووشم و قسە و گەرمكردنی بازاڕی سیاسی ناكرێت، بەڵكو تواناكانی تۆ چییە و چۆن ئەو توانایانە دەخەیتە گەڕ.  

"لە وتارەكەی سەرۆكی حكوومەت هەستم بەوە نەكرد كە مەبەستی كەمكردنەوەی مووچەیە، راستە مووچەی پلە باڵاكان كەم دەكرێتەوە، بەڵام مووچەی ئاسایی نا، پێم وایە جارێكی تر چاوخشاندنەوە بە پەیكەری وەزیفی دەكرێت، رەنگە ئەوە بە هاوئاهەنگی بێت لەگەڵ حكوومەتی عێراق، چونكە بەشێكی زۆر لە بودجەی بەكارخستن لە عێراق بۆ مووچە دەچێت، بۆیە رەنگە هەردوولا بە هاوئاهەنگی بیر لە داڕشتنەوەی هەیكەلی وەزیفی بكەنەوە، بەشێوەیەك گونجاو بێت لەگەڵ پێویستی دامەزراوەكانی حكوومەت، بۆ نموونە وەزارەتێك فەرمانبەرانی زیاتر لە پێویستی هەبێت، ئەوان بێكار دەبن، بۆیە دەبێت لیستێك بە ژمارەی فەرمانبەرانی پێویتسیان پێیەتی ئامادە بكەن"، بابكەیی روونی كردەوە.

ئاماژەی كرد، لەلایەكی تر یاسای چاكسازی زۆر روونە، بەوەی چاوخشاندنەوە بە میلاكات دەكرێت، بۆ نموونەی رێكخستنەوەی میلاكات و حیساباتی یەكەكانی 70 و 80 ی پێشمەرگە، مووچەی كەسوكارانی شەهیدان و دەرماڵەكان بەگشتی، ئەوانەی بە كردەنی دەرماڵەكە دەیانگرێتەوە پێیان بدرێت، بە هەمان شێوە زیندانیانی سیاسی، ئەوەیش بۆ جێبەجێبوونی پرەنسیپی دادوەریی كۆمەڵایەتی و لەلایەكی تر بۆ رێكخستنەوەی دەرماڵەكانیان، هەروەها ئەو لەشكرە بندیوارەی باس دەكرێت، كە یەكێكە لە هۆكارەكانی تەنگاوبوونی تاقمێك لەناو یەكێتی نیشمانیی كوردستان و هەوڵ بەربەست بۆ حكوومەت دروست بكەن و بە بیانووی مووچەی فەرمانبەران، شەڕی حكوومەت دەكەن، لەوكاتەی خۆیان چەندان جومگەی سەرەكیان لەو حكوومەتە هەیە، بۆیە یەكێك لەو هۆكارانەی نەیاریان بۆ حكوومەت جێبەجێكردنی یاسای چاكسازییە ، چونكە بەشێكی زۆری ئەو بنیدوارانە سەر بەو حزبەن.

بابكەیی دووپاتی كردەوە، كاتێك مەسروور بارزانی دەڵێت لە بەرەی گەلم، واتە ئەو بە ویستێكی پۆڵایینەوە دەیەوێ یاسای چاكسازی جێبەجێ بكات و پرەنسیپی دادوەریی كۆموڵایەتی بێنێتە كایەوە، دۆخی دارایی حكوومەتی هەرێم باشتر بكات، هاوكات دەبێت خەڵك بەئاگابێت ئەو برادەرانەی ئەولا لە خەمی گیرفانی خۆیانن، نەوەك لە خەمی مووچە و شایستە داراییەكانیان، ئەگەر كەسێك هەبێت لە خەمی ئەو خەڵكە بێت، سەرۆكی حكوومەتی هەرێمی كوردستانە، كە شەو و رۆژی خستووەتە سەر یەك بۆ دابینكردنی مووچە و خزمەتگوزارییەكان بۆ هاووڵاتییانی خۆی. 

 



وشە - مه‌حموود ئیسماعیل

ئه‌م بابه‌ته 245 جار خوێنراوه‌ته‌وه‌‌