هەواڵێكی پەلە و پیرۆز


ئاراس نووری


سەرۆكایەتی دەوڵەتی "كوردیا"
بە ناوی كوردستانی مەزن و میهرەبان
بە خوێنی نەمرەكانی كورد دەنووسین

هاووڵاتییانی نیشتمانی كوردی ئازاد لە دەوڵەتی "كوردیا". لەم رۆژانەدا دەنگۆیەك دزەی كردووەتە ‌ناو میدیاكانەوە، گوایە كوردانی "كوراقچی" لە "عێراقی عرووبە" جیا نابنەوە و دژ بە دروستبوونی دەوڵەتی "كوردیا"ن. 

ئێمە وەك دەسەڵاتی "ئێكسیكوتیڤ"ی دەوڵەتی "كوردیا" و بە ئاگاداری دەزگەی باڵای بەرگری لە ئاسایشی نەتەوەیی، دەمانەوێت هەڵوێستی خۆمان بەرامبەر بەم رەوشە یەكلا بكەینەوە:
برادەرانی "كوراقچی" بەشێكن لە بوونەوەرەكانی كوردستانی باشوور، چ لە دەرەوە چ لە ناو كوردستان. ئەمانە بڕیاریان داوە لە نیشتمان جیا ببنەوە و سەربە دەوڵەتی "كوردیا" نەبن.  ئەمە مافی خۆیانە و ئێمە رێزی لێ دەگرین و یارمەتییان دەدەین بە ئامانجی خۆیان بگەن و بەسەلامەتی بە هاوبیر و هاوشانی خۆیان شاد ببنەوە. 

پڕۆژەی بە شادكردنەوەی "كوراقچییەكان" بە عێراقی عرووبە:
١-  هەموو "كوراقچی"یەكانی بڕیاری "نەخێر"یان دا بۆ سەربەخۆیی كوردستان، دەبێت بە خۆیان و جانتایەك كە كێشی ٢٥ كیلۆ زیاتر نەبێت و توورەكەیەكی بچووك، بەشی ٥ كیلۆ "نانی تیری" و لیترێك "دۆی كوردی" بكات، بۆ رێگە، (ئەمانە دیاری حكوومەتی دەوڵەتی كوردیا دەبن بۆیان)، لە ماوەی ٢٤ سەعاتدا دەوڵەتی "كوردیا" جێ بێڵن.

٢- هەموو موڵكی گوازراوە و نەگوازراوەكانی "كوراقچی"یەكان، دەبنە موڵكی "دانیشتووانی" كوردرەگەزی دەوڵەتی "كوردیا"، ئەمانەش وەك: گرد، باخ، شاخ، بێستان، خانوو، موەلیدە، باخچە، مووچەكانی خانەنشینی، میراتی، پارەی بانك، مۆڵ، كارخانە و بۆری و بیری نەوت. تەنیا موڵك كە بۆیان هەبێت بیبەن لە تەك خۆیاندا، فەرهەنگی عەرەبی عەرەبییە.

٣- "كوراقچییەكان"ی پێشێلی خاڵی ١ و ٢ دەكەن و بەهۆی ناسیاوی ناو حزبەكان و دەرەوەی حزبەكانەوە، هەوڵ بدەن فێڵ بكەن و پارە و موڵك بگەیەنن بە دەرەوەی دەوڵەتی "كوردیا"، دەكرێنە بارمتەی دەوڵەت. (خۆمان دەزانین ئەمانە هەوڵ دەدەن بە قاچاخ موڵك بگەیەننە دەرەوە).

٤-  ئەم بارمتە "كوراقچییانە" هەتا موڵكی دەوڵەتی كوردیا دەگەڕێننەوە، بۆ ئەوەی نەبنە بارێكی ئابووری بەسەر هاووڵاتیی كوردەوە، دەبێت سەر شەقامەكانی شار و گوندەكانی كوردیا گسك بدەن و خۆڵی ئۆرگانیك لە نائۆرگانیك جیا بكەنەوە (ژینگەپارێزی لە خۆمانەوە دەست پێ دەكات).

" -5كوراقچی"ـیەكان دەتوانن بە ڤیزا بێنە ناو سنووری دەوڵەتی "كوردیا"ی بەهەشتی سەر زەوین. دەبێت داواكارییەكانیان رادەستی وەزارەتی بەرگری و چاودێریی دەوڵەت و دەزگەی باڵای بەرگری لە ئاسایشی نەتەوەیی بكەن. مانەوەیان بۆ یەك هەفتە بێ پارەیە، دوای ئەوە هەموو رۆژێك دەبێت باجی ٢٠٠ یۆرۆی كوردی بدەن بە خەزێنەی  "دژەخیانەت" و "دژەجاشێتی" و "بوون بە كورد".

٦- دەبێت هەموو رۆژێك بچنە سەرۆكایەتیی ئاسایشی نەتەوەیی و واژووی بكەن كە هیج ئاژاوەیەكیان نەناوەتەوە و بە زمانی دوژمن قسەیان نەكردووە، ئەگەر نا دەستبەجێ دەردەكرێن.

٧-  ئەو كوراقچییانەی هەست بە هەڵەی خۆیان دەكەن، چانسێكی تریان دەدرێتێ و دەتوانن بمێننەوە لەناو دەوڵەتی كوردیا. بۆ ئەوەی ئامادە بكرێن بۆ پێكەوەژیان لەگەڵ هاووڵاتییانی "بەڵێ بۆ سەربەخۆیی كورد"، كۆرسی گونجاندنییان بۆ دەكرێتەوە و فێری "بوون بە كورد" دەكرێن. 

ئەوانەی دڵیان بۆ عێراقی عرووبە لێ دەدات، دەبێت بەوپەڕی كوردبوونەوە یارمەتییان بدرێت بڕۆن.
دوای ئەوەی كوراقچییە پاتریۆتەكان بە سەلامەتی دەرچوون، هەوڵێكی پاكسازی سەرانسەری نیشتمان دەست پێ دەكرێت بەم شێوازە:

-  هەموو ئەوانەی لە كوردستانن و عەرەبزمان و عەرەب رەگەزن، رێزیان لێ دەگیرێت و نابنە بەشێك لە دەوڵەتی "كوردیا". ئەمانە جێی متمانە نین، بەڵام بۆیان هەیە هەموو موڵكی گوازراوە و نەگوازراوە و پیسی و خاش و خۆڵیان، عەگال و دشداشەی عەرەبی (دەزانین كۆمەڵێك ژن و پیاوی كورد ڕاهاتوون بەم پۆشاكانە، بەڵام ئیتر یاسا یاسایە) لە دەوڵەتی "كوردیا" ببەنە دەرێ و هیوای ژیانێكی درەوشاوەیان بۆ دەخوازین لە دەوڵەتی "عێراقی عرووبە". سەفەرێكی خۆش بێ گەڕانەوە.

-  زمانی سەر شەقام و ناوماڵ و ناو مزگەوتەكان و خوێندگە و زانكۆ و سەرقەبران و حەمام و سەیران و باخچەی منداڵان، تەنیا زمانی كوردی دەبێت.

- هەرچی زمانی ئەو میلەتانەیە كە نەتەوەی كوردیان چەوساندووەتەوە و كوشتاریان كردووە و خاكیان داگیر كردووە، لە دەوڵەتی "كوردیا " قەدەغەن، جگە لە گۆرانییە خۆشەكانیان، موزیك هونەرە و دەبێت رێی پێ بدرێت گوێی لێ بگیرێت، بەڵام هەر كەسە و لە ماڵی خۆی.
- بۆ جێبەجێكردنی ئەم خاڵە، ئەوانەی سەر بە ئاینی ئیسلامین، دەبێت قورئانی پیرۆزی عەرەبی بكەن بە كوردی و نوێژ بە كوردی بكرێت و هەموو نوێژەكانیان دەبێت بە دەنگی بەرز جێبەجێ بكرێت، لەژێر زمانەوە قبووڵ ناكرێت. جگە لەوە، هەرچی بۆنە ئاینییەكانی ئیسلامیی هەیە، دەبێت بكرێتە كوردی.

-  ئەو هاووڵاتییانەی دەوڵەتی كوردیا كە دەچنە "حەج"ی عەرەبی، دەبێت ئەو خەرجییەی دەیكەن بۆ حەج، دوو ئەوەندە بخەنە ناو كاسەی "ئاین بە زۆر نابێت".

-  لە داهاتوودا دەوڵەتی "كوردیا" هەوڵ دەدات لەگەڵ دەوڵەتی "عێراقی عرووبە" پێوەندییەكی تەندروست و دراوسێتی دابڕێژێت و گۆڕینەوەی كەسانی پسپۆڕ و بەتوانا بكاتە پڕۆژەی دراوسێیەتی و رێگە دەدات "عێراقی عرووبە" باڵوێزخانەی لە دەوڵەتی "كوردیا" هەبێت.

-  یاسای ئاسایشی نەتەوەیی دەوڵەتی "كوردیا" رێگە نادات لە باڵوێزخانەی "عێراقی عرووبە" كەسانی گومانلێكراوی سەربە كەمینەی "كوراقچی" كە هاووڵاتی "عێراقی عرووبە"ن، كاربەدەست بن. ئەمانە گومانلێكراون و هەڵگری ڤیرۆسی خیانەتن.

ئەم بڕیارانە دەزگای "ئیكسیكوتیڤ" بە چاودێری و یارمەتی دەزگەی باڵای بەرگری لە ئاسایشی نەتەوەیی دوای دەرچوونی جێبەجێی دەكات.

كڕنووش دەبەین بۆ خوێنی نەمرەكانی كورد
سەرمان دادەنوێنین بۆ دایكی نەمرەكانی رێی خەبات
بژی كورد بژی كوردستان
سەرۆكایەتی دەوڵەتی "كوردیا"



PM:04:09:12/07/2017




ئه‌م بابه‌ته 18911 جار خوێنراوه‌ته‌وه‌‌