راستییەكەی لە پاش پارتی دیموكراتی كوردستان، نەوەی نوێ براوەی ئەم هەڵبژاردنە بوو و كورسیی زیاد كرد، ئەم زیادكردنەی كورسیش ڕێكلامی زەبەلاح و فریودەری بۆ كرا لەلایەن كەناڵەكانی شاسوار، تەنانەت كەناڵە ئاینییەكەیشی خستبووە خزمەت كاندید و گڵۆپە سووتاوەكەی. هەرچەند لەوەشدا هەر درۆی شاخداری دەكرد و پێش دوو ساڵ بینیمان لەبەر قەرزاری، سیناریۆیەكی منداڵانەی داڕشت و هاتە سەر شاشە گوتی، ئێن ئاڕ تی چیتر هی من نییە و فرۆشتم، كەچی هەرزوو دەركەوت قسەكەی بنەمای نییە.
با لە بیری نەكەین كە لە نێوان ئەم دوو هەڵبژاردنەدا، سێ ساڵی لەدایكبوون بۆ دەنگدان زیادی كردووە كە یەكەمجاریان بوو بەشداریی هەڵبژاردن بكەن، بەوپێیەی خولی پەرلەمان چوار ساڵ جارێكە و لەو ماوەیەدا هەزاران دەنگدەری نوێ دەنگ دەدەن، بەڵام هی عێراق چونكە پێشوەختە بوو، دەنگدەرە نوێیەكان كەمتر بوون كە بۆ یەكەمجارە دەنگ دەدەن. بەڵام وێڕای ئەوەش جووڵانەوە و گڵۆپە سووتاوەكەی شاسوار، بەراورد بە هەڵبژاردنی پێشوو (۱۷٥٠٥) دەنگی كەم كردووە و لە دەستی داوە.
ئێستە باودۆخەكە هێندە ئاستنزم بووە، لە سایەی نەمانی پڕۆژەی گرنگی ناڕەزایی و بێئومێدبوونی خەڵك لە ئۆپۆزسیۆن، هاوكات نەمانی سەركردەی كاریگەر بۆ ململانێی پارتی، شاسوار بووەتە ئۆپۆزسیۆن، بەڵام پڕۆژەكەی و كارەكتەرەكانی هێندە دەمهەراش و بێ ئاستن، ئەگەر تاك تاك خەڵك ئومێدیشی مابێت بۆ باشتر، ئەویش لەناو دەبەن. ئاخر ئەمانە داماڵراون لە هەموو بەهاكان و خەڵك واقی وڕ ماوە ئەم چەقەچەقە چییە لە پەرلەمان و شاشەوە دەیكەن.
ئاشكرایە نەوەی نوێ جووڵانەوەیەك نییە خاوەن تێزێكی فكری بێت بۆ كار و چالاكی سیاسی و حوكمڕانی، ئایدیا و مۆراڵ و بەرنامەی سەقامگیری نییە، گوتاری نادیار و لاستیكییە، پۆپۆلیستە و نەخشەڕێی بۆ چارەسەری كێشە و گرفتەكانی خەڵك پێ نییە، تەنیا هەستی خەڵك دەقۆزنەوە و لە كوێدا كەموكورتییەك هەبێت، بە درۆوە دەڵێن ئێمە چاكی دەكەین، كەچی تا ئێستە نەمانبینیوە هیچیش چاك بكەن.
كێشەیەكی تری ئەم جووڵانەوەیەی شاسوار ئەوەیە، هەلومەرجێكی مێژوویی یان واقیعی خۆڕسك، یاخۆ داوا و پێویستی خەڵك دروستی نەكردووە، بەڵكو بوونی ژمارەیەك پەیامنێر و لە كەناڵی تەلەڤزیۆن زاون، ئەمەش یەكەمجارە دەزگای راگەیاندن خۆی وەك جێگرەوەی حوكمڕانی پێشان بدات لە مێژووی مرۆڤایەتیدا، بەڵام تەنیا یەك شت ڕوونە، ئەویش قۆستنەوەی بۆشایی ئۆپۆزسیۆنی ڕاستەقینە و كاركردن لەسەر جەماوەری گۆڕان و هێرشكردنی قسەكردن بۆ سەر بنەماڵەی تاڵەبانی، هەڵیتۆقاندووە، تۆ دیقەت بكە لەوەشدا دەڵێی بەكرێ گیراوە، تەنیا ناوی منداڵی تاڵەبانی دەبات و قەت یەك وشەی لەبارەی لاهوور نەگوتووە، لە كاتێكدا كێشە و سەرپێچی و نەگبەتییەكانی سلێمانی ئەم هۆكاری سەرەكی بووە.
باشترین بەڵگە بۆ سەلماندنی دووڕوویی شاسوار و نەوەكەی، تەماشاكردنی ئێن ئاڕ تییەكانی چوار و دووە، لە هەموو تایپێك خەڵك فریو دەدەن و هەندێ كوردی مەینەتبار وا دەزانن شاسوار پیاوی خوایە و ئیماندارییەكەیان بۆ پتەو دەكات، نابینن لە كەناڵەكەی تری خەریكی سووكردنی كۆمەڵگە و راكێشانی هەموو كەسێكە كە بە میزاجی ئەوان قسە بكەن و هونەری سووك نمایش بكەن، رەنگە دووریی نێوان ئەو كەناڵانە هەرچەند مەترێكیش بێت.
دواتر هەر خۆی دەپووكێتەوە، یان لە دەستەوارەیەكدا شاسوار خۆی دەیفرۆشێت
دەزانم ئەم جووڵانەوەیە وەك هێزە ئۆپۆزسیۆنەكانی تر، بۆ ماوەیەك كەمێك لە دەنگی ناڕازیی هەندێ مرۆڤی كوردی سادە دەچنێتەوە، بەڵام دواتر هەر خۆی دەپووكێتەوە، یان لە دەستەوارەیەكدا شاسوار خۆی دەیفرۆشێت و دەڕوات. چونكە حزبەكانی تر بەهێز بن یاخۆ لاواز، پڕۆژە و دنیابینی سیاسیی خۆیان هەیە، ڕۆشنبیر و كەسایەتیی دیاریان هەیە، بەڵام نەوەی گڵۆپە سووتاوەكەی شاسوار، هەر لە خۆیەوە كە سەرۆكە، پاتاڵ و بێ كەسایەتین تا دواپەلەمانتاریان. بۆیە جووڵانەوەكەی سەراپا ساختە و لۆمپن و هیچ لەبارا نەبوون.
دەتوانم بڵێم شاسوا كاڵفامێكە دەیەوێ لەڕێی سیاسەتەوە پەرە بە بازرگانی و پڕۆژە و پارەكانی بدات، ببێت بە قۆڵبڕێكی نایابتر و چیتر گرفت و لەمپەر بۆ پڕۆژەكانی دروست نەبێت.
شاسوار دەبێت لەو ڕوانگەیەوە بیناسین كە پیاوێكی هێندە بێ ئاست بوو، كامێرای دەخستە ژووری نوستنی ئەندام پەرلەمانەكانیەوە و هەڕەشەی ئەخلاقی و رووشاندنی رەوشتی لێ دەكردن، چەندان ئابڕووچوونی تریشی هەیە.