ئاڵای ئێمەی كورد بەری ڕەنجی سەتان ساڵەی گەلێگی ستەملێكراوە، خوێنی هەزاران شەهیدە، ناڵە و ئاهی سەتان هەزار دایكی جەرگسووتاوە، دووكەڵی سووتاندنی پێنج هەزار پەپوولەیە، ڕووفاتی 182 هەزار ئەنفالە و خوێنی هەشت هەزار شەهیدی بارزانی جینۆسایدە. ئاڵای كوردستان سیمبۆلی كەركووك و خانەقین و شنگاله، ئیتر تێناگەم شەرەف چییە و چۆنە؟
من هەرگیز لەگەڵ ئەوەدا نیم بڵێم درێژە بە خراپەكاری بدرێت لە ژێر پەرچەمی ئاڵای كوردستاندا، بەڵام سووكایەتیكردن بە ئاڵا هیچ گرفتێك چارەسەر ناكات، دڵنیام لەوەی ئەو كەسانەی سووكایەتییان بە ئاڵای كوردستان كرد لە سلێمانی، خوێندكار نین و هەر دوێنێ لە كاتی خۆپێشاندانەكاندا وێنەی چەند كەسێك بڵاو كرایەوە خۆیان خزاندبووە ناو خۆپێشاندان، ئیتر ڕوون و ئاشكرابوو كە خۆپێشاندانی قوتابیان بەرەو ئاراستەیەكی تر هەنگاو دەنێت.
دەست دەبەن بۆ پیرۆزییەكانی ئەم وڵاتە
لە كوردستان بەتایبەتی لە سلێمانی، كۆمەڵێك بەناو ڕۆژنامەنووس و چاودێری بەناو سیاسی و كۆمەڵێك بازرگانی سیاسی، لە هەموو خۆپێشاندانێكدا وەك ئەو بەرنامەی دایانڕشتووە، دەست دەبەن بۆ پیرۆزییەكانی ئەم وڵاتە، ئەم جۆرە لە بەرنامە بۆ نەهێشتنی هەستی نیشتمانی و بێبەهاكردنی پیرۆزی نیشتمان، بێ بەرنامە و لەناكاو نییە، بەڵكو دەستی تابووری پێنجەمی لە پشتە بۆ لاوازكردنی پێگەی نەتەوەیی كوردستان لە ئایندەدا. ئەگەر بەراوردێك لە نێوان عێراق و هەرێم بكەین لەڕووی خزمەتگوزاری و تەندروستی و ئاسایش و ئاوەدانییەوە لە دوای ساڵی 2004، بە سەتان و هەزاران خۆپێشاندان كراون، بەڵام ڕۆژێك نەمابینی ئاڵای عێراق لەلایەن خۆپێشاندەرێكەوە بسووتێنرێت یا بخرێتە ژێر پێ.
ئەوەی جێی پرسیارە ئاڵایەك بووبێتە سیمبۆلی نادادیی و نەبوونی خزمەتگوزاری و داڕووخانی ژێرخانی ئاسایشی ئەو وڵاتە و سیمبۆلی چەوسانەوەی نەتەوەكانی تری عێراق بێت، جێی شانازی هاووڵاتییانیش بێت و بیخەنە سەر شانیان و خۆپێشاندانی پێوە بكەن وەك شانازی بۆ عێراقییەكان! بەڵام ئاڵای كوردستان سیمبۆلی ئەو هەموو بەرخودان و قوربانیدانانە بێت كە هیچ وڵات و میلەتێك لە كورد زیاتر ئەو شەرەفی میراتگریی قوربانیدانەی نییە، لەلایەن كۆمەڵێك سیاسی ئانارشیستی بێ مۆڕاڵەوە لە هەموو خۆپێشاندانێكدا گەنجەكانمان هان دەدرێن بە لێدان و تێكدانی پیرۆزییە باڵاكانی ئەم نیشتمانە.
ڕاستە لە كوردستان كەموكوڕی هەیە و داخوازی هەموو چین و توێژەكان ڕەوایە كە ڕووبەڕووی حكوومەتی دەكەنەوە، ئەوەشی پێش چاوە حكوومەتی هێندەی توانای هەبووە، درێغی نەكردووە لە هەوڵی باشتركردندایە، هەموو خەڵكی كوردستان ئەوە دەزانن ئەو خزمەتكردن و پێشوەچوونانەی لە كوردستان بەدی هاتووە، خراپ نییە، بەڵام مافی خۆیشیانە داوای باشتر بكەن و حكوومەتیش بە پەرۆشە بۆ جێبەجێكردنی داواكارییەكانیان، بەڵام جێی داخە ئەو بێ ڕێزیكردنە زیاتر لە سنووری سلێمانی ڕوو دەدەن، هۆكارەكەیشی بۆ ئەو دۆخە شڵەژاوە سیاسییە دەگەڕێتەوە لەو شارە ڕوو دەدەن، بەرپرسیاریەتییەكەیشی لە ئەستۆی یەكێتیی نیشتمانیی كوردستانە كە وەك حاكمی ئەو سنوورە خۆیان وێنا دەكەن و ڕێیان داوە سلێمانی بێتە پەناگەیەك بۆ هەرچی دژە نیشتمان و دژە كوردە، بەناوی ئازادی ڕادەربڕینەوە.
خۆی ئەگەر دروست بیر بكەینەوە، نەبوونی پاپەندی و تێڕوانین بۆ هەستی نیشتمانی، بەڕەڵایی نیشتمانی بەرهەم دێنێت، بۆیە پێویسته هەرچی كێشەیەك لەناو حزبەكاندا هەیە، هەوڵ نەدرێت لەسەر حیسابی پیرۆزییەكانی كۆی خەڵكی كوردستان پاكتاو بكرێت، تێڕوانینی گەنجەكانمان بۆ ئایندەی ئەم نیشتمانە پەرشوبڵاو بكرێت.