چیا هەورامی: ناتوانم چەوساوە و ژێر دەستی كەس بم
چیا هەورامی خانمە ڕاگەیاندكاری جوانی تەمەن 25 ساڵ، لە دایكێكی هەورامی و باوكێكی شارەزووری لە دایك بووە، لە ساڵی 2005 دەستی بە كاری هونەری كردووە و وەك ئەكتەری دراما و كورتە فلیم بەشدار بووە، لە ساڵی 2012ەوە وەك پێشكەشكار كار دەكات و چەندان بەرنامەی تایبەتی لە كەناڵە جیاجیاكان پێشكەش كردووە. لەم دیمانەیەی "وشە"دا وەڵامی چەند پرسیارێك دەداتەوە.

* وەك سەرتا چۆن هاتیتە ناو كاری راگەیاندنەوە؟
رێكەوتێكی سەیر بوو، سەرەتا هەنگاوەكانم زۆر قورس بوون، ئێستە هەندێك ڤیدیۆم هەیە سەیریان دەكەم و تەریق دەبمەوە، بەڵام ئەو هەنگاوانە بە ئەمڕۆی گەیاندووم، هیوادارم لە ئایندە وەك پێشكەشكاری جیهانی ئۆپێرام لێ بێت، هیوا بۆ هەموو پێشكەشكارەكانیش دەخوازم.

* هەست دەكرێت ژمارەی ئافرەتانی ڕاگەیاندنكار كەم دەبێتەوە و هەندێكیشیان بەرەو كاری بازرگانی دەچن، بۆچی؟
كوردستان تاكە وڵاتە كە گرنگی زۆر كەم بە ڕاگەیاندكاران و هونەرمەندانی خۆی دەدا و  مووچەیەكی كەمیان پێ دەبەخشێ‌ لە بەرامبەر كارەكانیاندا، رەنگە هۆكارەكەی ئەوە بێت یان كۆمەڵێَك هۆكاری كۆمەڵایەتی، سیاسی و خێزانی، لەبەرئەوەی هەندێك تەگەرە هەن بۆ ئافرەتانی ڕاگەیاندكار كە ئەگەری زۆری هەیە كەسەكە واز لەو خەونەی بێنێت. بابەتی بازرگانیش ماندووبوونی كەمە و داهاتی زۆرە، هونەرمەندیش وەك ئەوانی تر حەز بەوە دەكات و مامەڵەی پێوە دەكات.

* بۆچی ناتوانی تا سەر لە كەناڵێكی ڕاگەیاندن بمێنیتەوە، زوو زوو دەڕۆیت و لە شوێنی تر پرۆگرام پێشكەش دەكەی؟
من قەت ناتوانم چەوساوە و ژێر دەستی خەڵك بم. خەڵكی ئێمەش فێری سەركێشانە ناو ژیان و كاروباری هاوكارانیانن، من ناتوانم قبووڵی بكەم ئەو هەڵسوكەوتە كۆنانەم بەسەردا بسەپێنن. وەك پێشكەشكاریش تا ئێستە لەگەڵ هیچ تەلەڤزیۆنێك كاری ڕەسمیم نەكردووە، هەمووی بەڵێننامەی كاتی بووە و دوای تەواوبوونی بەرنامەكە، كەناڵەكەم جێ‌ هێشتووە، زۆر جار خەڵك پێم دەڵێن بۆ لەو شوێنە دەركراویت، من لە هیچ شوێنێك دەرنەكراوم، بەڵام دوای تەواوبوونی گرێبەستەكە، نوێی ناكەمەوە. بۆ ئەوەی تەلەڤزیۆنی "كورد ماكس"یش كە زووتر لە تەواوبوونی گرێبەستەكە وازم هێنا، كێشەیەك لە نێوان من و دەرهێنەرەكە ڕووی دا، منیش نەمتوانی بەردەوام بم، هەر لەبەرئەوە ڕاستەوخۆ بەرنامەكەم جێ‌ هێشت و چەندان جاریش بە شوێنمدا ناردوویانەتەوە، بەڵام من خۆم نەگەڕاومەتەوە.

* ئامانجت چییە لەو پرۆگرامانەی پێشكەشیان دەكەی؟
من پرۆگرامی جیاوازم كردووە، هەندێكیان بۆ كەیفخۆشی بینەران بووە، دوو پرۆگرامی كۆتاشم بەناوەكانی (ماڵئاوا و سەردان و سوپرایز) بووە بۆ خزمەتكردن بە بنەماڵەی پێشمەرگە سەربەرزەكان كە خۆشی و شادی بخەمە دڵی مناڵەكانیان، هەموو جار دەڵێم دەبا كۆشكی زێڕین بكرابایە بۆ پێشمەرگە و ئێمە بباینایە پاسەوانی ئەوان كە بە نەبوون و هەژاریش هەر پێشمەرگەن. زۆر ماڵی پێشمەرگەم بینیوە لە سەلاجەی ماڵەوەیان یەك پەرداخ ئاو نەبووە كە چوومەتە ماڵیان وا پێشوازییان لێ‌ كردووم، حەزم دەكرد هەموو دنیام بۆیان بكڕیبایە، بەڵام بەداخەوە كە داوای یارمەتیم لە خەڵكی دەوڵەمەند بۆ ماڵە پێشمەرگە دەكرد، زۆر بەكەمی ئامادە بوون هاوكاری پێشكەش بكەن، هەرچەندە لێرەوە جێی دەستخۆشییە ئەوانەی بەشدارییان كردووە، خەڵكی باشیشمان هەیە ئامادەی هاوكارییە لە هەموو كات و ساتێكدا، خۆیان بە قەرزداری پیشمەرگە دەزانن، بەڵام ڕێژەكەیان زۆر كەمە، چاوەڕوانی زیاترم لە دەوڵەمەندەكانی كوردستان دەكرد.

* دەگوترێت خۆشەویستت هەبووە و وازت لێ‌ هێناوە، ئەوە راستە؟ 
ئەو بابەتە زۆر كۆنە و هی ئێستە نییە، چەند ساڵ لەمەوپێش بوو، بەڵێ‌ وازمان لە یەكتر هێنا، لەبەر كۆمەڵێك كێشە و پێكەوە نەگونجان. كوڕە خاڵی خۆیشم بوو، تا قۆناغی دەستگیرانداری رۆیشتین، بەڵام قسمەت نەبوو.

* لە دەستپێكی هەڵبژاردنی شاجوانی كوردستاندا ڕەخنەی زۆرت هەبوو، بۆچی؟
ئاخر ناچێتە عەقڵەوە هەڵبژاردنی شاجوانی كوردستان بێت، بەڵام بەشدارانی تورك یان فارس یان عەجەم بن، دوای ئەوەش پێوەری سەرەكیی شاجوانی كە لە ناوەكەیەوە دیارە جوانییە، دوای ئەوەش كۆمەڵێك پێوەری تر هەن كە لەلایەن لیژنەوە دادەنرێت و دەبێت بەو فلتەرانە تێپەڕ بن ئەوكات هەڵدەبژێردرێن، شاجوانی كوردستان تەنیا دەبێت كورد بەشدار بێت، ئەم مافە پارێزراوە بۆ كچە نەشمیلەكانی كورد.

* پاشگری ناوی هەورامیت بۆ بەخۆتەوە خستووە؟
لە ماڵەوە هەموومان بە هەورامی قسە دەكەین، تەنانەت باوكیشم هەورامی نییە و بە هەورامی قسەمان لەگەڵدا دەكات، بەكوردییەكەی دایكم زۆردارترە.

* چەند جار عاشق بووی؟ چەند جار پەشیمان بووی لە خۆشەویستییەكەت؟
عاشقبوون تەنیا یەك جارە، من پێشتر خۆشەویستم هەبووە و زۆریشم خۆش ویستووە، پەشیمانیش نیم چونكە بووەتە وانە بۆم، جارجاریش بیری لێ‌ دەكەمەوە.

* كام گۆرانیبێژەی پیاو لە هەستی تۆوە نزیكە كە هەست دەكەی گۆرانییەكە بۆ تۆ دەڵێت؟ 
یەكەم هونەرمەند زەكەریا عەبدوڵا و دووەمیان ئەحمەد خەلیل، ئاواتیشم ئەوە بووە وەك ئەوان دەنگم خۆش بوایە و گۆرانییەكی ئەوانم بگوتایە.

* پڕۆژەی تازەت چییە؟
من تازە پرۆگرامی سەردان و سوپرایزم كۆتا پێ‌ هێناوە، كۆمەڵێك ئیشی تازەم لەلایەن چەند كەناڵێكەوە بۆ پێشنیاز كراوە، بەڵام هێشتا بڕیارم لەسەر نەداوە كامیان هەڵبژێرم. كارێكی سینەماییشم لە بەردەستە كە كارێكی جیهانی و رژدە، زۆر بە وردی و پڕۆفیشناڵی كاری لەسەر كراوە لەگەڵ كۆمپانیای دوكیو، زۆر تامەزرۆم دەستی پێ بكەین، چونكە دڵنیام كارێكی جوان دەبێت.

وشە/ میران محەمەد


PM:03:21:08/10/2016




ئه‌م بابه‌ته 46513 جار خوێنراوه‌ته‌وه‌‌

زیاتر ...