ترامپ: بە هیچ شێوەیەك لە هەڵبژاردنەكان ناكشێمەوە
دوای بڵابوونەوەی گرتە ڤیدیۆیەكی دۆناڵد ترامپ كە تیایدا سووكایەتی بە ژنان دەكات، میدیا و دەسەڵاتدارانی ئەمەریكا پاڵەپەستۆیان خستووەتە سەر بۆ ئەوەی لە هەڵبژاردنەكان بكشێتەوە، بەڵام ترامپ سوورە لەسەر بەردەوامبوونی.

شەوی شەموو 8ی تشرینی یەكەم/ئۆكتۆبەر، دەیان ئەندامی باڵای حزبی كۆماریخوازی ئەمەریكا داوایان لە دۆناڵد ترامپ، پاڵێوراوی حزبەكەیان كرد لە هەڵبژاردنەكانی سەرۆك كۆماری ئەمەریكا بكشێتەوە.

دوابەدوای ئەو داواكارییە ترامپ لە چاوپێكەوتنێكدا بۆ "واڵ ستریت جۆرناڵ" رای گەیاند، ئەگەری وازهێنانم لە هەڵبژاردنەكانی ئەمەریكا "سفر"ە و بە هیچ شێوەیەك ئەو شتە روو نادات.

دوای بڵاوبوونەوەی گرتە ڤیدیۆكەی ترامپ كە حەوت ساڵ لەمەوبەر تۆمار كراوە، لە راپرسییەكاندا هیلاری كلینتن بە رێژەی 10% ی دەنگەكان پێش ترامپ كەوت و ئەوەیش بووەتە هۆی نیگەرانی كۆماریخوازەكان لە شكستخواردنی بەرامبەر هیلاری لە هەڵبژاردنی 8ی تشرینی دووهەم/نۆڤەمبەر.

ترامپ لە واشنتن پۆست ڤیدیۆیەكی دۆناڵد ترامپی بڵاو كردەوە كە تیایدا ترامپ باس لە پێوەندییەكانی لەگەڵ ژنان دەكات و دەڵێ، "كاتێك ناوبانگت هەبوو دەتوانی هەر شتێكت بوێت لەگەڵ ژنان بیكەیت" و دواتر باس لە هەوڵەكانی دەكات كە لەپێناو سێكسكردن لەگەڵ ژنێكی خێزاندار ئەنجامی داوە و نەیتوانیوە سەر بكەوێت.

دوای بڵاوبوونەوەی ڤیدیۆكە ترامپ راگەیاندنێكی دەركرد و تیایدا ئاشكرای كرد، ئەو گفتوگۆیە هاوڕێیانە بوو لەكاتی خۆ ئامادەكردنە بۆ بەرنامەیەكی تەلەڤزیۆنی كە مێژووەكەی بۆ 11 ساڵ لەمەوبەر دەگەڕێتەوە، بێل كلنتن قسەی زۆر لەوانە رەقتری لای من گوتووە كاتێك بەیەكەوە یاری گۆڵفمان كردووە، ئەگەر كەسێك لەو قسانەی من تووڕە بووبێت، داوای لێبوردنی لێ دەكەم.

هاوكات شەوی رابردوو ترامپ لە تویتەردا نووسیویەتی، لەلایەن میدیاكان و حزبی دەسەڵاتدارەوە پاڵەپەستۆیەكی زۆرم خراوەتە سەر بۆ ئەوەی لە هەڵبژاردنەكان بكشێمەوە، بەڵام هەرگیز لایەنگرانم ناهومێد ناكەم و بەردەوام دەبم.

وشە/دەنگی ئەمەریكا- و. هیدایەت جان


AM:10:56:09/10/2016




ئه‌م بابه‌ته 4064 جار خوێنراوه‌ته‌وه‌‌

زیاتر ...