وەزیری بەرگریی سووریا بڵاوی كردەوە، هەموو گرووپە چەكدارەكان لە ژێر چەتری وەزارەت یەكخران، مۆڵەتی 10 رۆژ بەو گرووپانەش دەدات كە هێشتا ماون و دەڵێت: خۆیان بێنە ناو وەزارەتی بەرگری، "دوای ئەو كاتە رووبەڕوویان دەبینەوە".
میدیای فەرمیی سووریا لە زاری وەزیری بەرگریی وڵاتەكەوە رای گەیاند، هەموو گرووپە چەكدارەكانی سەربە دەسەڵاتدارانی نوێی دیمەشق، چوونەتە ژێر چەتری وەزارەتی بەرگریی وڵاتەكەوە.
مورهەف ئەبو قەسرە وەزیری بەرگریی سووریا رای گەیاندووە: "هەواڵی یەكخستنی تەواوی یەكینەكان لە ژێر چەتری وەزارەتی بەرگریی سووریا بە گەلی شكۆمەندمان رادەگەیەنین"، بەڵام بەناو ناوی هیچ گرووپێك ناهێنێت كە چوونەتە ناو هێزەكانی وەزارەتی بەرگری.
وەزیرەكەی سووریا كە تازە لە تۆڕە كۆمەڵایەتییەكان هەواڵی تەجمیلكردنەكەی لووتی بڵاو كرایەوە و خەڵكێكی زۆر بەگاڵتەوە باسیان لێوە كرد، هەڕەشە دەكات و 10 رۆژ مۆڵەت بەو گرووپانەی تر دەدات كە بچنە ناو وەزارەتی بەرگری، دوای ئەو ماوەیە رووبەڕووی یاسایان دەكاتەوە وەك خۆی دەڵێت.
ئەبو قەسرە دەڵێت: "دووپات لە پێویستیی هاتنی گرووپە چەكدارە بچووكەكانی تر بۆ ناو وەزارەت دەكەینەوە، لە ماوەی ئەوپەڕی 10 رۆژ لە دوای ئەم راگەیەنراوە." هۆشداریش دەدات كە "هەر دواكەوتنێك وادەكات بەگوێرەی یاسا بەركارەكان رێكاری گونجاو بگرینەبەر."
وەزیرەكەی ئەحمەد شەرع باسی گرووپەكان دەكات، بەڵام ناوی هەسەدە ناهێنێت كە چۆن ئەوان بچنە ناو وەزارەتەكەیەوە، دیارە تا ئێستە لەسەر میكانیزمی تێكەڵكردنەوەی هەسەدە لەگەڵ وەزارەتی بەرگریی سووریا رێكنەكەوتوون.
ئێستە كە حكوومەتێكی راگوزەریان پێكهێناوە، كۆمەڵگەی نێودەوڵەتی چاوەڕێی چاكسازی و گرەنتیكردنی پاراستنی یاسا و تەناهییان لێ دەكات، كە ئەوە مەرجێكی لابردنی گەمارۆ ئابوورییە نێودەوڵەتییەكانی سەر وڵاتەكەیە.
قامیشلۆ و دیمەشق تا ئێستە لەسەر چارەنووسی هەسەدە رێكنەكەوتوون كە خاوەنی زیاتر لە 100 هەزار شەڕڤان و هاوبەشی سەرەكیی ئەمەریكایە لە شەڕی دژی سەرهەڵدانەوەی داعش.
وەزارەتی ناوخۆی سووریا وەك ئاژانسی فەرمی وڵاتەكە بڵاوی كردووەتەوە، پەیكەری ئاسایشی وڵاتەكەی دادەڕێژێتەوە و رۆژئاوای كوردستان و سووریا بۆ پێنج ناوچەی جیۆگرافیی سەرەكیی تەناهیی دابەش دەكات.
میدیای سووریا و میدیای سعوودیە دەڵێن، چەند سەرچاوەیەك لە وەزارەتی ناوخۆی سووریا پێی راگەیاندوون، وەزارەتەكە دەستی بە پەیكەرێكی رێكخستنی نوێ كردووە بە ئامانجی رێكخستنەوە و نوێكردنەوەی دەزگای ئاسایش و پۆلیس.
وەك سەرچاوەكان دەڵێن، "ئەم هەنگاوە دابەشكردنی وڵات بۆ پێنج ناوچەی جیۆگرافی سەرەكی لەخۆ دەگرێت، هەر ناوچەیەك لەلایەن یاریدەدەرێكی وەزیری ناوخۆوە سەرپەرشتی دەكرێت.
دوای دیدارەكەی شەرع لەگەڵ ترەمپ، دەسەڵاتدارانی سووریا هەست بەپشتقایمی وڵاتانی عەرەبی و رازیكردنی ئەمەریكا دەكەن، بۆیە بێمنەتانە لێدوان دەدەن و بەئاسانی باسی خۆهەڵوەشاندنەوەی گرووپەكان بەتایبەت هەسەدە دەكەن، كە ئەمەش پێشهاتێكی نوێیە و كێشەیەكی ترە بۆ كورد لە سووریا.
ئەو پێنج ناوچەیەی لە میدیای سعوودییەوە باس دەكرێت، بریتین لە ناوچەی رۆژهەڵات "حەسەكە، رەقە، دێرەزوور، ناوچەی باكور "حەلەب، ئیدلب"، ناوچەی كەناراوی "لازقیە، تەرتووس"، ناوچەی ناوەڕاست "حمس، حەما" و ناوچەی باشوور "دیمەشق، دەرعا، سوەیدا، قونەیترە".