دۆناڵد ترەمپ سەرۆکی ئەمەریکا، ئەمڕۆ هەینی چواری تەمووز، ئەو هێرشانەی کە ویلایەتە یەکگرتووەکان ئاراستەی دامەزراوە ئەتۆمییەکانی ئێرانی کردووە، بە "گەورەترین هێرشی ئاسمانی" لە مێژووی وڵاتەکەیدا لەقەڵەم دا و دووپاتی کردەوە کە بووەتە هۆی "سڕینەوەی" بەرنامە ئەتۆمییەکەی ئێران.
ترەمپ لە لێدوانێکدا گوتی، هەرکەسێک گومانی هەبێت لەوەی کە ئێمە پیتاندنی یۆرانیۆمی ئێرانمان لەناوبردووە، درۆزنە. ئێمە بەرنامە ئەتۆمییەکەی ئێرانمان لەناوبرد و گەورەترین هێرشی ئاسمانیمان لە مێژوودا ئەنجام دا.
هەروەها گوتیشی، بەتەواوی هەموو ئەو ئامانجانەمان لەناوبرد کە لە ئێران پلانمان بۆ دانابوو. ئێمە خاوەنی گەورەترین کەرەستەی سەربازین لە جیهاندا و خاوەنی بەهێزترین سوپاین لە جیهاندا.
سەرۆکی ئەمەریکا درێژەی بە قسەکانیدا و گوتی، یەکەمین کاری سەربازیمان هێرشە بەهێزەکە بوو بۆ سەر ئێران و ڕەنگە بەم زووانە لەگەڵ ئێرانییەکان کۆببینەوە.
ئەو گوتی کە، ئێرانییەکان پێیان گوتم کە دەیانەوێت 14 مووشەک ئاراستەی هێزەکانی ئەمەریکا بکەن و پێشوەختە هاوئاهەنگییان لەگەڵ مندا کرد و منیش ڕەزامەندیم لەسەر ئەوە نیشان دا.
لە بەشێكی تری قسەکانیدا گوتی، ئێمە بنکە ئاسمانییەکەمان لە قەتەر چۆڵ کرد پێش ئەوەی ئێران دەست بە بۆردمانکردنی بکات و قەتەر بەڕاستی مامەڵەیەکی نایابی لەگەڵدا کردین.
ترەمپ ئاشکرای کرد کە ئەمڕۆ هەینی لە کۆشکی سپی پێشوازی لەو فڕۆکەوانانە دەکات کە دامەزراوە ئەتۆمییەکانی ئێرانیان بۆردوومان کردووە.