دوای ٢٧ ساڵ بۆ یەكەمجار عەبدوڵا ئۆجەلان پەیامێكی ڤیدیۆیی بۆ ڕای گشتیی بڵاو كردەوە و ڕای گەیاند، باوەڕم بە هێزی سیاسەت و ئاشتی كۆمەڵایەتیی هەیە نەك چەك، بانگەواز لە ئێوەش دەكەم ئەم پرەنسیپە پراكتیزە بكەن.
عەبدوڵا ئۆجەلان بۆ یەكەمین جار لە ماوەی 27 ساڵی لە گرتووخانەی ئیمراڵی و لە ژێر گۆشەگیری تونددا، پەیامێكی ڤیدیۆیی بڵاو كردەوە، پەیامەكەی لە چوارچێوەی بانگەوازی "ئاشتی و كۆمەڵگەی دیموكراتیك"دا بڵاو كردووەتەوە.
دەقی پەیامەكە بەمشێوەیەیە:
هاوڕێیانی هێژا
لەبارەی كێشە و رێگەچارەكانی دۆخی بەرجەستەی ئەم قۆناغەی تەڤگەری هاوڕێیەتی كۆمیناڵیمان پێ گەیشتووە، بە ئەركێكی ئەخلاقییانەم زانی بە نامەیەكی بەرفراوانی دووبارەییش بێت، وەڵامی ئاشكرا و خوڵقێنەرتان بدەمەوە.
١- پێداگرم لەسەر بانگەوازییە مێژووییەكەی ٢٧ـی شوباتی ٢٠٢٥ بۆ ئاشتی و كۆمەڵگەی دیموكراتی.
٢- بە كۆنگرەی ١٢ و هەڵوەشاندنەوەی (پەكەكە) وەڵامێكی تاكۆتا دروستی ئەرێنی و بەرفراوانی ئەمەتان دایەوە، ئەم هەڵوێستەتان بە وەڵامێكی مێژووییانە لە قەڵەم دەدەم.
٣- دەبێت ئەم دۆخەی ئێستە وەك ئەنجامێكی بە بایەخ و مێژوویی پەسند بكرێت. هاوكات ڕەنجی ئەو هاوڕێیانەی كە رۆڵی پرد دەگێڕن شایستەی ڕێز و گرنگی پێدانێكی هاوئاستە.
٤- لە سەرەنجامی سەرجەم گۆڕانكارییەكاندا، مانیفێستۆیەكی كۆمەڵگەی دیموكراتیم ئامادە كرد كە دەبێت بە وەرچەرخانێكی مێژوویی بژمێردرێت. ئەم مانیفێستۆیە بە سەركەوتوویی شوێنی مانیفێستۆی ٥٠ ساڵەی "رێگەی شۆڕشی كوردستان" دەگرێتەوە. لەو بڕوایەدام كە نەك تەنیا بۆ كۆمەڵگەی مێژوویی كورد، بۆ كۆمەڵگەی هەرێمی و گەردوونیش ناوەڕۆكێكی كۆمەڵگەیی مێژوویی هەڵگرتووە. گومانم نییە كە ئەمە نموونەیەكی سەركەوتووی نەریتی مانیفێستۆی مێژووییە.
٥- پێویستە بەئاشكرا ئەوە بڵێم كە هەموو ئەو گۆڕانكارییانە سەرەنجامی ئەو دانیشتنانەن لە ئیمراڵی ئەنجامم داون. بە وریاییەكی بەرزەوە كار كراوە بۆ ئەوەی دانیشتنەكان لەسەر بنچینەی ئیرادەی ئازاد بن.
٦- ئەم قۆناغەی پێی گەیشتووین، هەنگاوی نوێ بۆ پراكتیزەكردن دەسەپێنێت. بە بایەخەوە جەختكردنەوە، تێگەیشتن و پابەندبوون بە بنەماكانی ئەم قۆناغە و ئەم هەنگاوە پێویستانەی گرنگییەكی مێژووییان هەیە، مەرجی درێژەپێدانن بەهەنگاوەكان. لێرەدا كۆتایی بەتەڤگەڕی پەكەكە دەهێنین كە وەك كاردانەوەیەك لە دژی نكۆڵیكردن لە هەبوونی كورد دەركەوت، بەئامانجی دامەزراندنی دەوڵەتێكی جیا ستراتیجییەكەی شەڕی رزگاری نەتەوەیی بوو. ئیدی ددان بە هەبوونی گەلی كورددا نرا و لەم سۆنگەیەوە ئامانجە سەرەكییەكە بەدی هاتووە. لەم واتایەدایە كە ماوەكەی بەسەرچووە. ئەوەی تر بە دووبارەیەكی زۆر و چەقبەستن هەڵدەسەنگێندرێت. لەم سۆنگەیەشەوە درێژە بە رەخنە و رەخنەدانی بەرفراوان دەدات.
بەو پێیەی سیاسەت بۆشایی هەڵناگرێت، دەبێت ئەو بۆشاییە بە بەرنامەی (ئاشتی و كۆمەڵگەی دیموكراتی)، بەستراتیجی (سیاسەتی دیموكراتی) و وەك تەكتیكی سەرەكیش بەحقووقی گشتگیرانە پڕ بكرێتەوە. ئامانجمان قۆناخێكی مێژوویی و چارەنووسسازە.
لە چوارچێوەی پرۆسەكەدا؛ ئارەزوومەندانە دانانی چەك و هەنگاوی دامەزراندنی كۆمیسیۆنێكی بەرفراوان كە وا بیری لێ دەكرێتەوە لە پەرلەمانی توركیادا بەیاسایی بكرێت و دەستڕۆیشتوو بێت، هەنگاوی گرنگن.
مەرجە هەنگاوەكان بە وریایی و هەستیارییەوە و دوور لە لۆجیكی نەزۆك و ململانێی من و تۆیی بنرێن. دەزانم كە هەنگاوەكانمان مایەپووچ نابن. ئەو راشكاوییە دەبینم و متمانەم پێیەتی. هاوكات هەوڵی چوونە ناو هەنگاوی كرداریتر و كلیلئاسایانەی بەرجەستە لە ئارادایە.
ئەو تێزانەی من دامناون سەرەكیترینیان ئەمانەن.
١- هەموو لایەك ئەركەكانی سەرشانیان جێبەجێ بكەن، گەیشتن بە ئامانجی (ئاشتی و كۆمەڵگەی دیموكراتی) بە گەیشتن بە رێنوێنییەكی ئینتەگراسیۆنیستی ئەرێنی بەدی دێت. لە سەرەنجامی هەموو باسەكاندا دەردەكەوێت كە: پەكەكە دەستبەرداری ئامانجی دەوڵەتی نەتەوە بووە، لەگەڵ دەستبەردان لەو ئامانجە بنچینەییە دەستبەرداری ستراتیجییەتی بنچینەیی شەڕیش بووە، كۆتایی بەهەبوونی خۆی هێناوە. چاوەڕێ دەكرێت ئەم قۆناغە مێژووییە بەرەوپێشتر ببرێت.
٢- بەشێوەیەك كە ببێتە مایەی واتادان بەپەرلەمان و كۆمیسیۆن و گومانەكانی ڕای گشتی لاببات و ببێت بە وەڵامی پێویستییەكانی جێبەجێكردنی بەڵێنەكەمان، دەبێت ئەوە ئاساییانە لێكبدرێتەوە كە زەوینەسازكار بن بۆ ئەوەی چەكدانان بۆ لایەنی پێوەندیدار و رای گشتی بەشێوەیەكی كراوە بكرێت.
دروستكردنی میكانیزمی چەكدانان پرۆسەكە بەرەوپێشەوە دەبات. ئەوەی دەكرێت هەنگاوێكی دڵخوازانەیە لە قۆناغی تێكۆشانی چەكدارییەوە بەرەو قۆناغی حقووقی و سیاسەتی دیموكراتییانە. ئەمە نەك بە شكست، بەڵكو دەبێت بەسەركەوتنێكی مێژوویی بزانرێت. وردەكاریی چەكدانان دەستنیشان دەكرێن و بە خێرایی پراكتیزە دەكرێن.
٣- دەم پارتی لەگەڵ پارتییەكانی تری ژێر چەتری پەرلەمان، بۆ گەیاندنی ئەم پرۆسەیە بەسەركەوتن پێكەوە ئەركی سەرشانیان جێبەجێ دەكەن.
٤- لەم ناوەدا لەبارەی دۆخی ئازادبوونی من كە وەك مەرجێكی سەرەكی لە سەرجەم نووسراو و بڕیارەكاندا هاتووە: خۆشتان دەزانن كە هەرگیز ئازادی خۆمم بە كێشەیەكی تاكەكەسی دانەناوە. لە رووی فەلسەفیشەوە ئازادی تاك، دوور لە كۆمەڵگە نابێت. تاچەند (تاك) ئازاد ببێت (كۆمەڵگە) و تاچەند (كۆمەڵگە) ئازاد ببێت (تاك)یش ئازاد دەبێت. مەرجە بەپێی ئەم مەیلە مامەڵە بكرێت.
بڕوام بە هێزی سیاسەت و ئاشتیی كۆمەڵایەتی هەیە، نەك چەك. بانگەواز لە ئێوەش دەكەم ئەم پرەنسیپە پراكتیزە بكەن. پێشهاتەكانی ئەم رۆژانەی دوایی لە هەرێمەكەدا، بە ئاشكرا گرنگی و پێویستیی ئەم هەنگاوە مێژووییەمان دەسەلمێنێت. دەبێت ئەوەش بڵێم كە لەبارەی پرۆسەكە پڕبەدڵ چاوەڕێی هەموو جۆرە رەخنە و پێشنیار و هاوكارییەكتانم. دەتوانم بە حەز و جۆشەوە جەختی لەسەر بكەمەوە و خۆم بە گەشبین و ئامادە دەزانم كە ئەم گفتوگۆیانە لەسەر ئاستی ناوچەكە و جیهانیشدا، ئێمە و هێزەكانی مۆدێرنیتەی دیموكراتی بە بەرنامەیەكی تیۆری و قۆناغێكی ستراتیجی و تەكتیكی دەگەیەنێت و لە ئێستەوە لەناو هەوڵ و ئامادەكاری ئەمەدان.
بانگەوازم بۆ قۆناغی داهاتوومان، با لەسەر بنچینەی بڕیارەكانی كۆنگرە و ئەو بۆچوون و پێشنیارانەی لەم نووسراوەدا باسم كردوون، قورسایی بخەینە سەر هەوڵەكانمان و پێشكەوتن و وەرچەرخانی سەركەوتووانە بەدی بهێنین.