شارەزایان پێیان وایە هێرشەكەی ئیسرائیل بۆ سەر قەتەڕ پەیامێك بوو بەوەی دەستی ئیسرائیل درێژە و وڵاتانی ناوچەكە، تەنانەت ئەوانەشی دۆستی ئەمەریكا و ئیسرائیلن، لە شەڕ بەدوور نابن ئەگەر داڵدەی گرووپەكانی نەیار بۆ تەلئەبیب بدەن، عێراق یەكێك لەو وڵاتانەیە كە ژمارەیەكی زۆر میلیشیای نەیار بۆ ئیسرائیل و ئەمەریكای تیادایە، شارەزایان پێیان وایە عێراق ترسی لەوە هەیە ئیسرائیل بیكاتە ئامانج و بە تەنیاش توانای وەڵامدانەوەی نییە.
لە دوای هێرشەكەی
ئیسرائیل بۆ سەر قەتەڕ محەمەد شیاع سوودانی سەرۆك وەزیرانی عێراق داوای پێكهێنانی هاوپەیمانیەتێكی سیاسی و تەناهی و ئابووریی ئیسلامی كرد، جیا لە هێزێكی هاوبەشی تەناهی بۆ بەرگریكردن، ئەوەش بۆ رووبەڕووبوونەوەی ئیسرائیل لەناو ئەو راپۆرتانەی باسی ئەگەری هێرشێكی ئیسرائیلی بۆ سەر عێراق لە دوای قەتەڕ دەكەن.
ئەحمەد یاسری توێژەری سیاسی دەڵێت، تەواوی وڵاتانی عەرەبی لە هێرشی ئیسرائیل بە هاوشێوەی سەر قەتەڕ دەترسن، هێرشەكە دیدی شرۆڤەكارانی بۆ جموجۆڵەكانی نەتنیاهۆ لە ناوچەكە گۆڕی، چونكە كەس پێشبینی نەدەكرد قەتەر بەر لە عێراق بكرێتە ئامانج، ئێستە مەترسییەكە لەسەر تەواوی وڵاتانی عەرەبی و توركیاش هەیە، جیا لە ئێران، بۆیە بابەتەكە تەنیا عێراق نەماوە و پێویستە عێراق بابەتەكە بخاتە چوارچێوەیەكی عەرەبی و ئیسلامی، نەك وەڵامدانەوەی بەتەنیا، چونكە توانای رووبەڕووبوونەوەی ئیسرائیلی نییە.
لای خۆیەوە غازی فەیسەڵ دیپلۆماتكاری پێشووی عێراقی پێی وایە پێویستە عێراق خۆی بەدوور بگرێت و بێلایەن بێت، رەنگە پێویست بە بەهێزكردنی هاوبەشی ستراتیجی لەگەڵ ئەمەریكا لە چوارچێوەی رێككەوتنی چوارچێوەی ستراتیجی لە 2008 بكات، لە رووی ئابووریشەوە بە رووی دنیا بكرێتەوە و رووبەڕووی گەندەڵی و قاچاغی نەوتی ئێرانی ببێتەوە و رێگری لە میلیشیاكان بكات عێراق بكەنە گۆڕەپانێكی شەڕ.
روونی كردەوە، دەبێت عێراق ببێتە هاوبەشێكی واشنتن یان هاوپەیمانێكی ستراتیجیی ئێران، لە حاڵەتی دووەمیش باجێكی قورس دەدات، چونكە تاران بە دیدی ئەمەریكا پاڵپشتیی سەرەكیی تیرۆرە لە دنیا، بۆیە دەبێت خۆی لە هاوچارەنووسی ئێران بپارێزیت، چونكە هەڕەشەكانی كوشتن تا ئاستی گۆڕینی سیستمی سیاسی لە وڵات بەردەوامن.