لە سایەی پەرەسەندنەكانی دۆخی ناوچەكە و ناوخۆیی عێراق، شارەزایان پێشبینیی داهاتوویەكی خراپ بۆ عێراق دەكەن، شارەزایەكی ستراتیجی وریایی دەدات بەوەی عێراق بەرەو قۆناغێكی زۆر مەترسیدار هەنگاو دەنێت، بەتایبەتی لە سایەی پەرەسەندنە خێراكانی نێوان ئەمەریكا و ئێران و زیادبوونی ئەگەری شەڕێكی راستەوخۆی هەردوولا.
ئەحمەد ئەنساری شارەزای ستراتیجی ئاماژە دەكات، ئاماژە سیاسی و سەربازی و تەناهییەكان لە ناوچەكە بە ئاراستەی دروستبوونی بەریەككەوتنێكی راستەوخۆی واشنتن و تارانە و بابەتەكە لە تەنیا سیناریۆیەكی پێشبینیكراودا نەماوە، بەڵكو بە ئاراستەیەك دەڕوات كە ناتوانرێت پێشی لێ بگیرێت، بەتایبەتی دوای شكستهێنانی هەوڵەكانی هێوركردنەوە و بەردەوامیی گوشارەكانی هەردوولا بۆ سەر یەكتر.
ئەو شارەزایە پێی وایە لە حاڵەتی هەڵگیرسانی شەڕ عێراق زەرەرمەندترین دەوڵەت دەبێت، ئەوەش بەهۆی هەڵكەوتە جوگرافییە هەستیارەكەی و بەریەككەوتنی بەرژەوەندیی ناوچەیی و نێودەوڵەتی لەسەر خاكەكەی، لە بوونی هێز و بەرژەوەندیی ئەمەریكی و پێوەندیی ستراتیجی و ئابووری و تەناهی لەگەڵ ئێران، ئەوانەو وایان كردووە عێراق بكەوێتە ژێر گوشارێكی بێ وێنەی سیاسی و تەناهییەوە.
ئەنساری دووپاتی كردەوە، ئاڵنگارییە پێشبینیكراوەكانی ئەو دۆخە ئاڵۆزە تەنیا تەناهی نین، بەڵكو بۆ دۆخی ئابووری و بازاڕی وزە و سەقامگیری ناوخۆیی پەل داوێن، بۆیە وەریایی لە پەرەسەندنی جەمسەرگیریی سیاسیی ناوخۆیی و ئەگەری رەنگدانەوەی هەر شێوانێكی تەناهی راستەوخۆ لەسەر ژیانی هاووڵاتییان دا.
ئەو شارەزایە ئاماژە دەكات كە پێویستە بۆ قۆناغی داهاتوو حكوومەتی عێراق سیاسەتێكی وریا پێڕەو بكات و خۆی لە ناكۆكییەكان بەدوور بگرێت و بەرژەوەندیی باڵای نیشتمانی پێش هەر شتێكی تر بخات، چونكە هەر هەڵەیەك لە ئیدارەدانی ئەو تەنگژە، باجەكەی لەسەر ئاسایش و سەروەری و سەقامگیریی گشتیی قورس دەبێت.