هەڵمەتە سەربازییەكەی ئەمەریكا و ئیسرائیل بۆ سەر ئێران و پەرەسەندنەكانی ناوچەكە بەردەوامن و هیچ ئاماژەیەك بۆ كۆتهاتنیان نییە، لەو ناوەدا بەهۆی میلیشیاكانەوە عێراق بووەتە گۆڕەپانێكی تری شەڕەكە و لە هەموو لایەكەوە بۆردمان دەكرێت، شارەزایان پێیان وایە عێراق بووەتە گۆڕەپانی یەكلاكردنەوەی حیساباتی وڵاتان و رۆڵەكانیشی بوونەتە قوربانی.
د. محەمەد نەعناع توێژەری سیاسی لە لاپەڕەی خۆی لە تۆڕە كۆمەڵایەتییەكان نووسیویەتی، حكوومەتی عێراق و هێزە سیاسییە سەرەكییەكان نەیانتوانی عێراق لە رووچوون بۆ ناو شەر دوور بخەنەوە یان بەرانبەر بە كردنەئامانجی دەرەكی پارێزگاری لە سەروەرییەكەی بكەن، ئەوەشی لەبارەی باشكردنی پێوەندییە دەرەكییەكان لەگەڵ رۆژهەڵات و رۆژئاوا كە باسی دەكرا، راست نەبوو.
روونی كردەوە، چەند جارێك ئاماژەمان بۆ ئەوە كرد كە دۆسیەی سیاسەتی دەرەوەی عێراق تەنیا لە لایەنە حكوومەتییەكانەوە بەڕێوە ناچێت، بەڵكو لایەنی نا حكوومەتیش دەستیان تیادا هەیە و ئەوانیش خاوەن توانایەكی گەورەترن لەوەی حكوومەت و لێوەی سوودمەندن.
نەعناع دووپاتی كردەوە كە هەموو لێدوان و رێنوێنییەكانی حكوومەت لەبارەی هێشتنەوەی چەك بە دەستی دەوڵەت رژد نەبوون، حكوومەت پلانێكی كردەنی بۆ لاوازكردن و بچووككردنەوەی هێزە سەربازی و تەناهییە هاوتاكان و داماڵینی چەك نەبوو.
ئەو توێژەر سیاسییە پێی وایە عێراق بووەتە گۆڕەپانێكی یەكلاكردنەوەی حیسابات و و ئەو هێرشانەی دەكرێتە سەری و بۆردمانە ئاڵوگۆڕەكان، رەنگە تا دوای شەڕی ئەمەریكا و ئێران بەردەوام بێت، ئەوەش دەبێتە پێشێلكاری بەردەوام و درێژخایەنی سەروەرییەكەی.