دوێنێ لە ناوەڕاستی بەغدا شیلی كیتلسۆن كچەرۆژنامەوانی ئەمەریكی لە لایەن میلیشیاكانەوە رفێنرا، وەزارەتی ناوخۆی عێراق ددانی بە رفاندنی دانا و ئاماژەی بۆ گرتنی رفێنەرێك كرد، زانیارییەكان باسی بردنی رۆژنامەوانەكە بۆ پارێزگای بابل دەكەن كە مۆڵگەی سەرەكیی كەتیبەكانی حزبولای تیادایە، شارەزایان ئەو رووداوە بە شكستێكی گەورەی تەناهی بۆ عێراق لەقەڵەم دەدەن.
موجاشیغ تەمیمی توێژەری سیاسی دەڵێت، رفاندنی كیتلسۆن ئاماژەیەكی خراپە لەسەر پووكاوەیی ژینگەی تەناهی لە عێراق، بگرە شكستێكی روونی تەناهییە لە دوای ساڵانێك لە باشبوونی دۆخی تەناهی، لە رووی ئابوورییەوە كردنەئامانجی بیانییەكان، لێدانێكی راستەوخۆیە لە متمانەی وەبەرهێنەران، چونكە سەرمایە بە دوای ژینگەیەكی سەقامگیردا دەگەڕێت، ئەو رووداوەش وێنەیەكی زۆر مەترسیدار بە عێراق دەبەخشێت، تۆماری ڤیدیۆیی رفاندنەكە وێنەیەكی نەرێنی وەك دەوڵەتێكی نائارام بە عێراق دەدات.
روونی كردەوە، لە رووەكانی سیاسی و تەناهیش، ئەگەر راست بێت لایەنی تەناهی لە رووداوەكە تێوەگلاون، وا دەكات ئەمەریكا وەڵامدانەوەی نائاسایی هەبێت بە گوشاری هەواڵگری تا هێرشی سنووردار، بەتایبەتی لە سایەی ئەو ئاڵۆزییەی لە ناوچەكە هەیە، ئەوەش حكوومەتی عێراق دەخاتە هەڵوێستێكی شەرمەزارەوە و وا دەردەكەوێت توانای كۆنترۆڵكردنی چەك و بەكارهێنانی هێزی نییە.
دوێنێ دیلان جۆنسۆن یاریدەدەری وەزیری دەرەوەی ئەمەریكا لە پۆستێك لە تۆڕی ئێكس نووسیویەتی، وەزارەتی دەرەوەی ئەمەریكا ئەو راپۆرتانەی بۆ هاتووە كە باسی رفاندنی رۆژنامەوانێكی ئەمەریكی لە بەغدا دەكەن، پێشتر وەزارەتی دەرەوە ئەوی لە هەڕەشەكان ئاگەدار كردبووەوە، لەگەڵ نووسینگەی لێكۆڵینەوەی فیدراڵی هاوئاهەنگ دەبین بۆ ئازادكردنی لە نزیكترین كاتدا.
ئەو بەرپرسە ئەمەریكییە ئاشكرای كرد كە دەسەڵاتدارانی عێراق كەسێكیان گرتووە و رەنگە پێوەندی بە گرووپی كەتیبەكانی حزبوڵای نزیك لە ئێرانەوە هەبێت، گومانی تێوەگلانی لە رفاندنەكە هەیە، دۆخی عێراق لەژێر ئاستی وریاكردنەوەیە بۆ گەشتكردن، بۆیە داوا لە ئەمەریكییەكان دەكەین ئێستە بەهیچ شێوەیەك نەچنە عێراق و ئەوانەشی لەوێن بەپەلە جێی بێڵن.