ناوەندی كریدنۆی ئەوروپی لە راپۆرتێكی تیشك دەخاتە سەر قووڵیی تەنگژەی ئابووری لە عێراق بۆ ئێستە و داهاتوو، دووپاتی دەكاتەوە كە بەغدا بۆ تێپەڕكردنی تەنگژەكە و سوودبینین لە یەدەگی دراوی بیانی كە هەیەتی، پێویستی بە بانكی فیدراڵیی ئەمەریكییە و ئەوە تاكە دەربازی عێراقە.
وەك لە
راپۆرتێكی ئەو ناوەندەدا هاتووە، تا ئێستە كاریگەریی لەدەستدانی عێراق بۆ توانای هەناردەكردنی نەوتەكەی بەهۆی داخرانی گەرووی هورمز بەتەواوەتی دیار نییە، بەڵام كاریگرییەكان بریتین بە گوشارێكی گەورەی كەمیی پارەی كاش و زەحمەتی پابەندبوون بە خەرجكردنی شایستە داراییەكان، وەك مووچە بەو هۆیەوە، جیا لە پاشەكشەی بەهای دیناری عێراقی و بەرزبوونەوەی رێژەی هەڵاوسان.
روونی كردەوە، بۆیە دۆخی داهاتووی ئابووریی عێراق سەختە، بەتایبەتی ئەگەر تەنگژەی ئێستەی گەرووی هورمز بەردەوام بێت، یان شەڕ فرەوانتر بێت و زیانی بەردەوام بە كەرتی نەوتی عێراق بكەوێت، تەنانەت ئەگەر ئێران و ئەمەریكاش بە رێككەوتن بگەن، بەگەڕخستنەوەی كێڵگە نەوتییەكانی عێراق زەحمەتە و ئەگەری دروستبوونی ئاڵۆزییەكان بەردەوامە، ئەوەش دەبێتە هۆی زەحمەتیی بەرهەمهێنان و هەناردەكردنەوەی نەوت.
راپۆرتەكە دووپاتی كردەوە حكوومەتی عێراق بۆ رزگاربوون لەو تەنگژەیە بۆ چەند مانگێك، پێویستی بە یەدەگی گەورەی لە دراوی بیانی هەیە، بەڵام ئەو یەدەگە لای عێراق خۆی نییە، بەڵكو لای بانكی فیدراڵیی ئەمەریكایە لە نیویۆرك نەك لە بانكی ناوەندیی عێراق، دەستبردن بۆ ئەو دراوەش مەترسیی گەورەی تیادایە و بە بڕیاری ئەمەریكی دەبێت، واشنتن بەوە دەزانێت، بۆیە وەك كارتێكی گوشار بۆ هەڵوەشاندنەوەی میلیشیاكان و داماڵینی چەكەكانیان و كۆتخستنە سەر حەواڵە داراییەكان بەكاری دێنێت.