ئیسرائیل راست و چەپ لە كردنەئامانجی بەرپرسانی بزووتنەوەی حەماس و حزبوڵای لبنانی بەردەوامە، ئێوارەی ئەمڕۆ سوپای ئیسرائیل كوشتنی چەند بەرپرسێكی باڵای تەناهیی بزووتنەوەی حەماسی فەلەستینی لە غەزە راگەیاند.
سوپای ئیسرائیل گوتی، لە ئەنجامی چەند هێرشێكی ئاسمانیی لە غەزە، حەسەن رەباح لبد جێگری سەرۆكی دەزگای ئاسایشی گشتیی بزووتنەوەی حەماس لە كەرتی غەزە كوژراوە، جیا لە كوشتنی هەریەك لە عازم ئەمین و عەبدوڵا عەتا و محەمەد نوعمان، كە بەرپرسی تەناهیی حەماسن.
بەپێی بەرپرسانی تەندروستیی فەلەستینی، لە ئەنجامی چەند هێرشێكی ئاسمانیی ئیسرائیل بۆ سەر كەرتی غەزە 10 فەلەستینی كوژراون، لەوانە پێنجیان لە یەك خێزانن، ئەوە لەوكاتەی لە تشرینی یەكەمی 2025 ئاگربەست لە كەرتی غەزە هەیە، بەڵام ئیسرائیل لە كوشتنی بەرپرسانی حەماس بەردەوامە.