برادەرێكی ئازیز پێی گوتم: دواجار واز لە نووسین دەهێنێ لەبارەی موسەنا سامەرائی و عالیە نوسەیف و هەیسەم جبووری و ئیبراهیم سومەیدعی و بنەماڵەی كەربوولی، دوای ئەوەی هەموویان گیران. منیش پێم گوت ئازیزم هێشتا نەهەنگی گەورە ماوە كەس لێی نزیك نەكەوتووەتەوە.
لەوانەیە ئەو شتەی هاووڵاتی بەستەزمانی عێراقی زۆر تووشی سەرسوڕمان كرد بێت، ئەوەیە لە یەكێك لە خولەكانی پەرلەمان موسەنا سامەرایی كرایە سەرۆكی لیژنەی دەستپاكی، كەناڵەكان زۆر مكوڕ بوون لە میوانداری حاجی ژن "عالیە نسەیف" گوایە سیمبولێكە لە سیمبولەكانی بەرەنگاربوونەوەی گەندەڵی لە وڵاتی رافیدەین. ئیبراهیم سومەیدعی قشتیش هەمیشە داوای لێ دەكردین سوپاس و حەمدی خوا بكەین بۆ ئەو نیعمەتەی تێیدا دەژین. لە لایەكی ترەوە بەها نووری پەرلەمانتار پێی راگەیاندین كە ئەركی پەرلەمانتار ئەوەیە پشتیوانی، "كچە مۆدێلەكان" بكات، ئەمە دوای ئەوەی كەوتبووە خۆ بۆ هاوكاری كچێكی هاوڕێی كە كچەكە دەیویست ئەفسەرێكی پۆلیس خانەنشین بكات، لە ماڵی كچە مۆدیلەكە لەگەڵ براكانی دادەنیشت. ئەی محەمەد سەیهودتان لەبیرە كاتێك بە زەردەخەنەوە باسی سەروەریی دەكرد و جنێوی بە گەندەڵی وگەندەڵكاران دەدات و گوایە بۆ حاڵی عێراق دەگریا.
هاووڵاتی عێراق بە باشی دەزانێ ئەوەی 23ی ساڵی رابردوو رووی دا ئەوە بوو پرۆسەی گەندەڵی رێكخرا بوو، پاڵەوانەكانی گەندەڵی پۆستەكانی خۆیان بەكارهێنا بوو بۆ گاڵتەكردن بە عەقڵی هاووڵاتیان، كۆمەڵێكیان لەگەڵ بوو لەوانەی چەپەڵە لێ دەدەن و پیشەی خۆیان كردبووە چاودێری سیاسی و ئاگاداریان دەكردینەوە، لەوەی نابێت لە گەندەڵكاران نزیك بینەوە. تا رۆژێكیان پیاوێكی ئاینیش دەركەوت و بە یەك وشە گوتی، "كامیان باشترە لە گەندەڵی بژین یانیش ئاژاوە، گەندەڵییەكە باشترە، ئەوەی دەدزێ با بدزێ، بەڵام من دەزانم لەكوێوە دێم و بۆ كوێ دەچم".
كاتێك دەمانگوت ئەو وێرانەیە تەنیا پێوەندی بە حكوومەت سوودانی نییە، وەك كەناڵەكان لەم رۆژانەدا باسی دەكەن، بەڵكو دەبێت پەرلەمان دۆسیەی حكوومەتكانی پێشوو بكاتەوە هەر لە ئەیاد عەلاوی و جەعفەری تا بە مالیكی و عەبادی و عەبدولمەهدی دەگات، هەموو ئەو حكوومەتانەی كە "جوانترین رۆژگارمان لەگەڵ بەسەر برد" لەسەر ئەو بۆچوونە بە خیانەت تۆمەتبار دەكرێین، بۆیە پێویستە باوەڕ بە محەمەد كەربوولی و حەسەن خەفاجی و كۆمەڵێك گەندەڵكاری تر بكەین كە مێشكی ئێمەیان بردووە، بەوەی پیلانگێڕی ئیمپریالیزم بێبەشی كردوون لە جێبەجێكردنی پڕۆژەی زەبەلاح، هەر ئەمەیش وای لێكردووین لە بلیمەتی مەحموود مەشهەدانی تێنەگەین، هەروەها پشت لە فەلسەفەی سیاسەتی گەشەپێدانی عەباس بەیاتی بكەین، باوەڕ بەوە بكەین كە وەزیرەكانی كارەبا دەیان ملیار دۆلاریان لە پرۆژەی وەهمی خەرج كردووە.
23 ساڵ لەگەڵ ئەو حكوومەتانە ژیاین هیچ شتێكیان نەبوو پێشكەشی عێراقییەكانی بكەن، هاوردەی مۆتە قەدەغە دەكەن، كەچی بیر لە چارەسەری كێشەی وزە ناكەنەوە و عێراقیش لەسەر دەریاچەییەك گازی سروشتی دەخەوێ. عێراق ئەمڕۆ دەیان ملیار دۆلار قەرزاری جیهانە و داوایش لە خەڵكەكەی دەكرێت دەست بە پارەوە گرن، یان چاوەڕێی نرخی نوێی دۆلار بكەن، دەیان هەزار كەس لەو وڵاتەدا لەژێر هێڵی هەژاری دەژی. هیچ پرۆژەیەكی گەشەپێدان و دادوەری كۆمەڵایەتی لەو وڵاتە نییە و لەو كاتەیشدا داوا لە عێراق دەكرێت پارەكەی بۆ گیرفانی نەهەنگەكانی گەندەڵی بگوازرێتەوە.
دەبێت مێژووێكی دادوەری بنووسرێتەوە، دوای ئەوەی هەموو دۆسیەكانی دزین تەواو دەبن و كاغەز و نهێنە ترسناكەكان دەكەونە بەر چاوی هاووڵاتیان.
وتاری عەلی حوسێن لە رۆژنامەی مەدا