هێزەكانی سەربە حكوومەتی كاتیی سووریا، لە تەل عەران هەڵمەتێكی فراوانی هەڵكوتانەسەر ماڵانیان ئەنجام داوە، تێیدا زیاتر لە 200 ئۆتۆمبێل و ماتۆڕسكیلی چەكدار بەشدار بوون. گەمارۆیەكی توندیان سەپاندووە، ڕێگەكانی هاتنەناوەوە و چوونەدەرەوەی شارەكە داخراون، هاوكات لەم ناوەندەشدا چەندان گەنجی كورد ڕفێنراون. هەسەدە بەتوندی ئەو كارە سەركۆنە دەكات.
لە كاتی ئەم هەڵكوتانەسەر لە تەل عەران چەندان ژنی كورد ڕووبەڕووی هێرش و توندوتیژی بوونەتەوە، لە ئەنجامدا ژنێك بە ناوی "نەزهە حەملكی" بریندار بووە.
تەل عەران كە دەكەوێتە باشووری ڕۆژهەڵاتی حەلەب، لەگەڵ "تەل حاسڵ"، یەكێكە لە كۆنترین نیشتەجێگاكانی كورد لە ناوچەكەدا. پێش قەیرانی سووریا، بە دەیان هەزار كورد و پێكهاتەی نەتەوەیی تر لێی دەژیان. لە ماوەی دەیان ساڵی دەسەڵاتی بەعسدا، دانیشتووانی ئەم دوو شارۆچكەیە، وەك ناوچەكانی تری كوردستان، ڕووبەڕووی پەراوێزخستن، پشتگوێخستن و گوشار بۆ سەر ناسنامە و كولتووری كوردی بووبوونەوە.
ئەنجوومەنی سووریای دیموكرات (مەسەدە) ڕای گەیاند، هەڵكوتانەسەر ماڵان و گرتنی هاووڵاتییانی كورد لە گوندەكانی حەلەب دژی سەروەریی یاسا و مافەكانی مرۆڤە.
ڕێكخراوەكە ئاماژەی بەوە كردووە كە هێزەكانی حكوومەتی كاتی، هاوكات لەگەڵ بڵاوەپێكردنی هێزی سەربازی، دەستیان بە پشكنینی ماڵان و پێشێلكاری دژی ژنان و بەساڵاچووان كردووە، ئەمەش ترسی گەورەی لە ناو دانیشتوواندا دروست كردووە.
هەسەدە دووپات دەكاتەوە كە ئەم پێشێلكارییانە لەگەڵ قۆناغی ڕاگواستنی سیاسی لە سووریادا ناگونجێن، كە دەبێت لەسەر بنەمای دادپەروەری و هاووڵاتیبوونی یەكسان بێت.
لە ڕاگەیەنراوەكەدا هاتووە كە بەردەوامیی ئەم جۆرە ڕەفتارانە هەڕەشە لە ئاشتیی كۆمەڵایەتی دەكات، متمانەی نێوان پێكهاتەكانی سووریا لاواز دەكات و ڕێگرە لە بەردەم بنیاتنانی دەوڵەتێكی دیموكراتیك.
لە كۆتایی ڕاگەیەنراوەكەدا، هەسەدە داوای ڕاگرتنی دەستبەجێی هێرش و پێشێلكارییەكان دەكات، هاوكات داواكارە تەواوی گیراوەكان تەل حاسڵ و تەل عەران ئازاد بكرێن، چارەنووسیان ئاشكرا بكرێت و لێكۆڵینەوەیەكی سەربەخۆش بۆ سزادانی بەرپرسانی ئەم هێرشانە ئەنجام بدرێت.
ناڕەزایەتییە توندەكانی هەسەدە نیشانەی قووڵبوونی درزی نێوان لایەنە كوردییەكان و هێزەكانی حكوومەتی كاتیی سووریایە لە قۆناغی نوێدا.