ئەمڕۆ ئیمامێكی بەناوبانگی ئەهلی سوننە لە سیستان و بلوجستان كوژرا و سوپای پاسدارانی ئێران دەڵێ، بە دەستی ئیسرائیلییەكان كوژراوە.
بەرەبەیانی ئەمڕۆ دووشەم 20ی تەمووز، لە شاری میرجاوەی پارێزگای سیستان و بلوجستان، محەمەد ئەنوەر ریغی كوژرا كە یەكێكە لە ئیمامەكانی ئەهلی سوننە لە شارەكەدا. سەرەتا میدیای فەرمیی ئێران بڵاویان كردەوە محەمەد ئەنوەر لەلایەن چەند چەكدارێكی نەناسراو كوژراوە.
موحسین موبارەكی بەرپرسی شارەكە بە ئاژانسی ئیرنای رای گەیاند، كوشتنی ئەو ئیمامە بۆ ئەوەیە دووبەرەكی بكەوێتە ناو خەڵكی ناوچەكە. دواتریش سوپای پاسدارانی ئێران، ئیسرائیلی بەوە تۆمەتبار كرد لە پشت رووداوی كوشتنی ئیمامەكەی سوننەیە، بە پیلانی ئەوەی دووبەرەكی بخەنە ناو ئێرانییەكان.