ب سەرپەرشتیا پارێزگارێ دهۆكێ، كۆبوونا لژنا ئه‌منى و تەکنیکی بۆ دیاركرنا رێكارێن گێرانا ئاهه‌نگێن نه‌ورۆزێ وجه‌ژنا ره‌مه‌زانا پیرۆز ل دهوکێ ب رێڤەچو، دیسان ل ئاکرێ ژی دێ جوانترین نەورۆز هێتەکرن.
دکومبونێ دا د. عەلی تەتەر، پارێزگارێ دهۆكێ دیار كر كو دڤێت ده‌زگه‌هێن ئێمناهیێ ویێن ره‌وشه‌نبیرى وجه‌ماوه‌رى رێكارێن پێدڤى وه‌رگرن بۆ وێ یه‌كێ به‌رنامێن جەژنێن نەورۆزێ و رەمەزانێ ب ئارامى بهێنه سازكرن و گوت، ئاهه‌نگێن نه‌ورۆزا ئه‌ڤ ساڵه ژى وه‌كو هه‌ر ساڵ ب ره‌نگه‌كێ شارستانى بهێنه ئه‌نجامدان وئاگر ژى ل جهێن ده‌ست نیشانكرن بهێنه هه‌لكرن و ژینگه‌ها ده‌ڤه‌رێ ساخلەمیا گشتى یا وەلاتیان بهێنه پاراستن .
ل باژێرێ دهۆکێ دێ نەورۆز چیتە پشتی فتارێ و نڤێژێن تەراویحا و بریار ئه‌وه دەمژمێر 9ێ شه‌ڤا 20 ل سه‌ر 21 مه‌ها ئادارێ ئاگرێ نه‌ورۆزێ ل پاركا نه‌ورۆز ل سه‌نته‌رێ دهۆكێ بهێتە هەلکرن، پاشی خەتیرێن ئاگری دێ بو سه‌رێ هەردوو چیایێن هنداڤ دهۆکێ بناڤێن كێلیا شه‌دا و کێلیا فرعینێ بهێنە برن و هەلکرن، پاشی ستران وسرودێن نیشتمانى بهێنه پێشكێشكرن.
ل باژێرێ ئاکرێ ژی وەکو نەریتەکێ سالانە دێ خەتیرێن ئاگرێ نەورۆزێ ب رەنگەکێ جوان و جودا بۆ سەرێ کەلها ئاکرێ و کەلەکەڤنێ و چەند جهێن دی ژلایێ گروپێن خوبەخش هێنە برن کو هژمارا وان 2725 خەتیرن، پاشی دێ ل سەرێ گری یاریێن ئاگری یێن مەزن و جیاواز هێنە بلندکرن، ئاکرێ دڤێت پارێزگارێی ل ناسناڤێ پایتەختێ نەورۆزێ بکەت.