چاوەڕوان دەكرێت ئەمڕۆ تەیف سامی وەزیری دارایی عێراق لیستی مووچەی فەرمانبەرانی هەرێمی كوردستان بۆ مانگی ئادار واژوو بكات، ئەگەر هیچ بیانوویەكی تر نەدۆزێتەوە.
درەنگانی دوێنی وردبینی لیستی مووچەی فەرمانبەران تەواو بوو، ئەمڕۆ لە عێراق پشوو نییە و دەوام ئاساییە، بۆیە ئەو لیستە بۆ رەزامەندی دەخرێتە بەردەم تەیف سامی تا واژووی بكات و مووچەی مانگی ئادار تەمویل بكرێت.
هەموو سەرچاوەكانی لیژنە تەكنیكییەكەی كوردستان كە ئێستە لە بەغدان دووپاتیان لەوە كردووەتەوە كە بە بەبێ هیچ كێشەیەك لیستەكە لە وردبینی دەرچووە تەنانەت تێبینی بچووكیش لەبارەیەوە نەبووە، بۆیە ئەگەر ئەمڕۆ تەیف سامی واژووی نەكات بیانووی خۆیەتی و پێوەندی بە كەمكوڕی لیستەكەوە نییە.
وەزارەتی دارایی و ئابووری هەرێمی كوردستان هەفتەی رابردوو زیاتر لە 48 ملیاری وەك داهاتی نانەوتی بۆ بەغدا ناردووە كە بە گوێرەی رێككەوتنی نێوان هەردوولا بووە، بۆیە هەموو بیانووەكانی بەغدا بڕاوە.
هەندێك لە میدیاكان باسی ئەوەیان كردووە كە محەمەد شیاع سوودانی سەرۆك وەزیرانی عێراق بڕیاریداوە پێش جەژن مووچەی فەرمانبەرانی عێراق بە كوردستانیشەوە دابەش بكرێت، بەڵام هیچ سەرچاوەیەكی فەرمی ئەوەی پشتڕاست نەكردووەتەوە.
لە كۆبوونەوەی هەفتەی ڕابردووتری ئەنجوومەنی وەزیرانی كوردستان، مەسروور بارزانی سەرۆك وەزیرانی كوردستان دووپاتی لەوە كردەوە كە هەوڵەكان بخرێنە گەڕ بۆ ئەوەی مووچە پێش جەژن دابەش بكرێت.
بە لێكدانەوە بۆ نەبوونی كێشە لە لیستی مووچەی ئەم مانگە و گوشارەكانی مەسروور بارزانی سەرۆك وەزیرانی كوردستان ئاماژەكان بۆ ئەوە دەچن كە لەم هەفتەیەدا پارەی مووچە هاوشێوەی پێشوو بە یەك گوژمە بنێردرێت و دەست بە دابەشكردنی مووچە بكرێت.