وەزارەتی كشتوكاڵ و سەرچاوەكانی ئاوی حکوومەتى هەرێمى کوردستان ناوی ئەو فەرمانبەرانەی راگەیاند كە لە وەزارەتەكە ناویان هاتووەتەوە بۆ وەرگرتنی زەوی و رەزامەندییان بۆ دەرچووە.
ئەمڕۆ چوارشەم، دووی نیسانی 2025، لە راگەیەنراوێكی وەزارەتی كشتوكاڵ و سەرچاوەكانی ئاودا هاتووە، لە سەرجەم فەرمانگەکانی سەر بە وەزارەتى کشتوکاڵ و سەرچاوەکانی ئاو (6118) فەرمانبەر سوودمەند دەبن لە پرۆسەی وەرگرتنى زەوى لە پارێزگا و ئیدارە سەربەخۆکانى هەرێمى کوردستان لەم لیستەدا.
زیاتر هاتووە، دوابەدواى بڕیارى ئەنجوومەنى وەزیران و دەرچوونى رێنوێنیی وەزارەتى شارەوانى و گەشتوگوزار، بەمەبەستى دابەش کردنى زەویى نیشتەجێبوون بەسەر فەرمانبەران و خانەنشینان، وەزارەتی کشتوکاڵ و سەرچاوەکانی ئاو بڕیاری دا، بە پێکهێنانى لیژنەى تایبەت بۆ هاوئاهەنگیكردن لەگەڵ وەزارەتى شارەوانى و گەشتو گوزار و فەرمانگەکانی سەر بە وەزارەتی کشتوکاڵ و سەرچاوەکانی ئاو و پێدانى ڕێنوێنى بۆ شێوازى پڕکردنەوەى فۆڕمەکان و چۆنیەتى شیکردنەوەى ڕێنوێنییەکان.
لە ڕاگەیەنراوەکەى وەزارەتی کشتوکاڵ و سەرچاوەکانی ئاو ئاماژە دراوە، دواى وەرگرتنى رەزامەندیى ئەنجوومەنى وەزیران و وەزارەتى شارەوانى و گەشتوگوزار لەبارەى ئەو ناوانەى کە سوودمەند دەبن لە وەرگرتنى زەوى، لە ئێستەدا سەرجەم ناوى سوودمەندان بڵاو دەکەینەوە لە سەرجەم فەرمانگەکانی وەزارەتی کشتوکاڵ و سەرچاوەکانی ئاو لە هەرێمى کوردستان.
لە راگەیەنراوەكەدا، وەزارەتی كشتوكاڵ چەند تێبینییەكی بڵاو كردووەتەوە بەمشێوەی خوارەوە:
1. گەڕانەوەى ناوى سوودمەندان لەلایەن وەزارەتى شارەوانى و گەشتوگوزار بەپێى کارتى زانیارى بووە، واتە کارتى زانیارى بۆتە بنەما بۆ دابەشکردنى زەوییەکان بەسەر سنوورى پارێزگاکان و ئیدارە سەربەخۆکان.
2. سەرجەم فۆڕمى سوودمەندان لە دیوانى وەزارەتەوە ئاراستەى وەزارەتى شارەوانى و گەشتوگوزار کرا، دوای وردبینی و پێداچوونەوە بە فۆرمەکان و لیستی ناوەکان ئاراستەی سەرۆکایەتیی ئەنجوومەنی وەزیران کرا و رەزامەندی وەرگیرا، دواتر لیستی ناوەکان و فۆرمەکان بۆ ئەنجامدانى کارى پێویست ئاراستەی سەرۆکایەتیی شارەوانییەکان دەکرێت لە پارێزگاکان و ئیدارە سەربەخۆکان.
هەولێر
سلێمانی