هەر لە بەردەوامیی سەردانەكەیدا بۆ تاران، نێچیرڤان بارزانی سەرۆكی هەرێمی كوردستان، لە دیدارێكدا لەگەڵ محەمەد باقر قالیباف، سەرۆكی ئەنجوومەنی شوورای ئیسلامیی كۆماری ئیسلامیی ئێران، لەبارەی پەرەپێدانی پێوەندییەكانی ئێران لەگەڵ عێراق و هەرێمی كوردستان، بیروڕایان گۆڕییەوە.
لە دیدارەكەدا، هەردوولا ستایشی بەرەوپێشچوونی پێوەندییەكانیان كرد. لەمبارەیەوە نێچیرڤان بارزانی، سوپاس و پێزانینی بۆ پشتگیری و هاوكارییەكانی كۆماری ئیسلامیی ئێران لە عێراق و هەرێمی كوردستان دووپات كردەوە.
هەردوولا دوایین پێشهاتەكان و بارودۆخی ناوچەكە و ئاڵنگارییەكانیان تاوتوێ كرد، لەسەر پێویستیی هاوئاهەنگی لایەنە پێوەندیدارەكان بۆ پاراستنی ئارامی و سەقامگیری هاوڕا بوون، هەروەها داكۆكییان لەسەر هاریكاریی هەمەلایەن لەسەر بنەمای بەرژەوەندییە هاوبەشەكان، كردەوە.