لە دیمانەیەكی نوێی لەگەڵ دەزگای میدیای "وشە"دا، فارووق رەفیق باس لە چەكدانانی پارتی كرێكارانی كوردستان و خۆهەڵەوەشاندنەوە دەكات و پێی وایە، هەموو ئەوەی دەكرێت لە پێناو ئازادكردنی ئۆجەلاندایە و هیچ لە بەرژەوەندی بزووتنەوەی كوردی لە باكوری كوردستاندا نییە.
فارووق رەفیق كە دەمێكە لەسەر زۆر كێشەی سیاسی و كۆمەڵایەتی و فكری كوردیی قسەی كردووە و چەندان كتێبی نووسیوە، لەم دیمانەیەدا بۆ "وشە" كە هێشتا بڵاو نەكراوەتەوە، تیشك دەخاتە سەر ئەو پرۆسەیەی بەناوی "ئاشتی" لە توركیا هەیە و دەڵێت: ئەوەی پەكەكە خەریكیەتی گەمژەییەكی بەكۆمەڵە.
فارووق باس لەوە دەكات، كەس لە كوردستان ناڵێت و نایەوێت بڵێت ئەوەی پەكەكە و ئۆجەلان خەریكین خراپە، زۆرینە بەناوی چەمكی "ئاشتی" ستایشی دەكەن، مامۆستای زانكۆ دەڵێت: ئەمە هەڵوەشاندنەوەی دەوڵەت نەتەوەی توركە، ئەمە بەڕاستی بڵاوكردنەوەی گەمژەییە كە ئێستە گەمژەیی وەك پەتایەك لە كوردستان بڵاو دەبێتەوە.
"لە پشتی توركیا 700 ساڵی حوكمڕانی هەیە، تۆ كێی دەڵێیت ئەم پرۆسەیە توركیا بە دیموكراتی دەكات، تۆی بێهێز ناتوانی بەرنامە بۆ بەهێز دابنێیت، كورد و پەكەكە بێهێزەكەن، ئەوان ناتوانن بەرنامە بۆ توركیای سەردەست و داگیركەری 100 ساڵ دابنێن". فارووق وا دەڵێت.
فارووق دەڵێت: پەكەكە كاری تەواو بووە و یەكێك لە هۆكارەكانیشی ئەو هەڵە ستراتیجییانەیە كە پێڕەوی دەكەن، یەكێكیش لە هەڵە گەورەكان بەخواكردنی ئۆجەلانە كە پەكەكە خەریكیەتی، هاوكات هەڵەیەكی تر ئەوەیە پەكەكە ئەوەندەی دژایەتیی جوو دەكات، ئەوەندە دژایەتی توركیا ناكات، یەكەم سەرباز بەدەستی پەكەكە دەكوژرێت، سەربازێكی ئیسرائیلییە نەك توركی، ئەم دژە جووییەی پەكەكەش گەرایەكە لە چەپی توركییەوە چووەتە ناو پەكەكە.
ئەم چەمكی بە دیموكراتیكردنەی توركیا پەكەكەی خست، تۆ باسی دیموكراتیی چی دەكەی، خۆت دنیایەك موقەدەساتت دروست كردووە و نایەڵیت كەس رەخنەیان بكات و دواتریش 50 ساڵە نایەڵیت هێزێكی تر لە باكوری كوردستان دروست بێت، چۆن دەتوانی باسی دیموكراتی بكەیت بۆ ئەویتر، دواتر ئێستە دیارە پەكەكە لە حزبێكی ستالینییەوە بووە بەكەڵتێكی ئاینی و دەپەرسترێت.
لە بەشێكی تری گفتوگۆكەیدا فارووق رەفیق باس لەوە دەكات، ئیمراڵی بووە بە ئیلهامبەخشی بزووتنەوەی كوردیی لە باكور، ئەمە لە كاتێكدا ئیلهامبەخش خۆی لە ژێر دەسەڵاتی داگیركەر و لە بەردەستی ئەواندا گیراوە.
توركیا یانی وڵاتی توركەكان، توركیا حەوت نەتەوەی تێدا دەژی، هەموو لە ماوەی ئەم ساڵانەدا كراون بە تورك، زۆرینەی توركیا یۆنانییە و ئێستە هەموو بە زۆر كراون بە تورك، تۆ لەگەڵ وڵاتێكی ئاوا، لەگەڵ نەتەوەیەكی ئاوا چۆن دەتوانی رێكبكەویت، ئەوان چی بە كورد دەدەن، مافی چارەنووس؟ نا ئەوان قەد ئەو عەقڵەیان نییە رێگە بەكورد بدەن بگاتە ئەو مافە، بەڵام مافی كولتووری دەدەن، تۆ بۆت هەبێت شەڕواڵێك لەبەر بكەیت، ئەمە شایانی ئەوەبوو 50 ساڵ وەك نەتەوەیەك قوربانی بۆ بدەیت؟.
ئەوەی ئێستە روو دەدات كێشەی كورد لە توركیا و باكوری كوردستان، كورت كراوەتەوە بۆ كێشەی ئازادكردنی ئۆجەلان و كورد لەم پرۆسەیەدا هیچ داخوازێكی تری لەوە گەورەتر نییە، بۆیە ئەمە هیچ بەرهەمێكی نابێت و هەمووی دژی پرۆسەی ئازادبوونی كوردە.
كورد و تورك برا نین و نابن، ئەمە پرۆسەیەكە ئەردۆغان هێناویەتییە ئارا بۆ ئەوەی لە دەسەڵات بمێنێتەوە، ئەگەر راست دەكەن با لە پەرلەمان بچن ددان بەو راستییەدا بنێن كە نەتەوەیەكی گەورەی وەك كورد لە توركیا دەژی و ئێمە لە مێژوودا هەڵەمان بەرانبەریان كردووە، توركیا ئەوە ناكات.