چاودێرێكی سیاسی رای دەگەیەنێت، ئەگەر بەغدا پێی وابێت لە ڕێگەی لاوازكردنی پێگەی كورد لە بەغدا و گوشار، زوڵم، برسێتی و بەكرێگرتنی جاشی ناوخۆیی، گەلی كوردستان ناچار دەكات دەستبەرداری مافە ڕەواكان و پرسی ڕیفراندۆمی سەربەخۆیی و دەوڵەتی كوردستان بێت، ئەوە لە وەهمدا جێماوە.
"نوێنەرانی كورد لە بەغدا رۆڵی راستەقینەی خۆیان ناگێڕن"
ئەمڕۆ یەكشەم، یەكی حوزەیرانی 2025، حەسیبە گەردی كە هاوكات پەرلەمانتاری پێشووی كوردستانە، بۆ "وشە" گوتی، ئەوەی ئەمڕۆ لە بەغدا ڕوودەدات تەنیا دەتوانرێت بە هەوڵێكی سیستماتیك بۆ خنكاندنی هەرێمی كوردستان لە ڕووی سیاسی و ئابوورییەوە پێناسە بكرێت، بە بەكارهێنانی ئامراز و میتۆدی ناشایستە لە لایەن دەوڵەتێك كە بانگەشەی دیموكراسی و فیدراڵییەت دەكات.
هەروەها رەخنەی لە بەرپرسانی كورد لە بەغدا گرت و گوتی، بەشی زۆری خاوەن پێگە و نوێنەرانی كورد لە بەغدا هیچ كاریگەرییەكی ڕاستەقینەیان نییە و نەبووە، كە لە بەرژەوەندیی گەلی كورد بەكاریان هێنابێت، ئەوان هێندەی شەڕی ئیمتیازاتی كەسیی خۆیان كردووە نیوهێندە داكۆكی مافی هاووڵاتییانی هەرێم و پرسە نەتەوەییەكانیان نەكردووە، بۆیە گرنگە بۆ داهاتوو پێداچوونەوە بكرێت و كەسانێكی نیشتمانپەر و بوێر لە سەر پشكی كورد دەسەڵات وەرگرن، كەسانێك بن ئیرادەی بەهێزی كورد پیشان بدەن.
دووپاتی لەوەیش كردەوە، ئەوانەی پڕۆسەی بڕیاردان لە بەغدا كۆنترۆڵ دەكەن، بەدوای بنیادنانی دەوڵەتدا نین، بەڵكو بە دوای چەسپاندنی هەژموونێكی مەزەوى و مەركەزییەتێكی نەخۆشن كە بەرگەی ئەوە ناگرن قەوارەیەكی سەركەوتووی وەك هەرێمی كوردستان خۆی حوكمڕانی بكات و سەرچاوەكانی بەڕێوە ببات و بە سوپایەكی شەرعی كە پێشمەرگەیە، خاكەكەی بپارێزێت.
"جاشەكانی ناوخۆ ئامرازی تێكدانن"
"سەرانی بەغدا بەردەوام هەوڵی سڕینەوەی مۆركی نەتەوەیی و بچووككردنەوەی قەوارەی دەستووریی هەرێمی كوردستانیان داوە بەشێوازی جیاواز، جا لە ڕێگەی داگیركاری، ئەنفال، جینۆساید، كیمیاباران، سووتاندنی لادێیەكان و...هتد، بێت یان بە ڕاگرتنی بەشە بودجە و هەڵوەشاندنەوەی ڕێككەوتن و پێشێلی بنەما دەستوورییەكان و بەكرێگرتن و زیندووكردنەوەی دیاردەی "جاشایەتی و پاشایەتی"، بە سوود وەرگرتن لەو جاشە هەرزە مەزادكراوە ناوخۆییانەی كە خۆیان بە حكوومەتی ناوەند فرۆشتووە لە بەرانبەر چەند دراوێك، وەك ئامرازێك بۆ تێكدانی نێوماڵ و یەكڕیزیی نەتەوەیی بەكاردەهێنرێن". گەردی وای گوت.
"سازش لەسەر كەرامەتی گەلی كورد ناكرێت"
لە كۆتاییشدا دەڵێ، ئەگەر بەغدا پێی وابێت لە ڕێگەی لاوازكردنی پێگەی كورد لە بەغدا و گوشار، زوڵم، برسێتی و بەكرێگرتنی جاشی ناوخۆیی، گەلی كوردستان ناچار دەكات دەستبەرداری مافە ڕەواكان و پرسی ڕیفراندۆمی سەربەخۆیی و دەوڵەتی كوردستان بێت، ئەوە لە وەهمدا جێماوە، چونكە دەبێت تێبگەن كوردستان پارێزگایەكی ژێردەستە نییە، بەڵكو قەوارەیەكی دەستوورییە و مافی خۆبەڕێوەبردنی تەواوەتی هەیە. هەر هەوڵێك بۆ كەمكردنەوە، پەراوێزخستن، یان سنوورداركردنی ئەم مافانە بدرێت، بە ئیرادەی بەهێزی نەچەماوەی گەل و سەركردایەتییەك كە سازش لەسەر كەرامەتی گەلی كورد نەكات، ڕووبەڕوو دەبێتەوە.