ئەنجوومەنی شوورای هەرێمی كوردستان بڕیاری دا، گشتاندنی وەزارەتی خوێندنی باڵای هەرێمی كوردستان هەڵبوەشێنێتەوە كە تایبەت بوو بە وانەگوتنەوە لە زانكۆ و پەیمانگە ناحكوومییەكان.
ئەمڕۆ دووشەم 23ـی حوزەیران، بەپێی بڕیارێكی ئەنجوومەنی شوورای هەرێم، بڕیار درا بەهەڵوەشاندنەوەی گشتاندنی وەزارەتی خوێندنی باڵا و تویژینەوەی زانستی ژمارە (17392) لە 5/ 9/ 2024، ئەویش قەدەغەكردنی وانەگوتنەوەی مامۆستایانی میلاكی وەزارەتی خوێندنی باڵا لە زانكۆ و پەیمانگە تایبەتەكان.
ئەنجوومەنی شوورای هەرێم لە ناوەڕۆكی بڕیارەكەیدا دەڵێت، میلاكی زانكۆ حكوومییەكان دوای تەواوكردنی نیسابی وانەگوتنەوە لە زانكۆ حكوومییەكان، دەتوانن لە زانكۆ و پەیمانگە تایبەتەكان (ئەهلییەكان) وانە بڵێنەوە بە رەزامەندیی سەرۆكی زانكۆ و كۆلێژ و بەش.
ئەوە لە كاتێكدایە پێشتر مامۆستایانی زانكۆ باسیان لەوە كردبوو، بڕیاری وەزارەتی خوێندنی باڵا وا دەكات مامۆستایان لە وانەگوتنەوە بێبەش بن لە زانكۆ تایبەتەكان، بەتایبەت ئەو مامۆستایانەی تازە بڕوانامەیان بەدەست هێناوە.