نێچیرڤان بارزانی سەرۆكی هەرێمی كوردستان، پێشوازیی لە نوێنەری تایبەتی سكرتێری گشتیی UN كرد، لە كۆبوونەوەیەكدا دۆخی سیاسی و گشتیی عێراق و هەرێمی كوردستان، هاریكاری و هاوئاهەنگیی نێوان یۆنامی و لایەنە پێوەندیدارەكان لە عێراق و هەرێمی كوردستانیان تاوتوێ كرا.
ئەمڕۆ پێنجشەم سێی تەمووز، نێچیرڤان بارزانی سەرۆكی هەرێمی كوردستان، پێشوازیی لە د. محەمەد ئەلحەسان نوێنەری تایبەتی سكرتێری گشتیی نەتەوە یەكگرتووەكان و سەرۆكی نێردەی نەتەوە یەكگرتووەكان بۆ هاوكاریی عێراق (یۆنامی) كرد.
لە كۆبوونەوەیەكدا دۆخی سیاسی و گشتیی عێراق و هەرێمی كوردستان، هاریكاری و هاوئاهەنگیی نێوان یۆنامی و لایەنە پێوەندیدارەكان لە عێراق و هەرێمی كوردستانیان تاوتوێ كرا. لەبارەی دوایین پێشهاتەكانی ڕۆژهەڵاتی ناوەڕاست و كاریگەری و لێكەوتەكانی بەسەر ناوچەكەوە، بیروڕایان گۆڕییەوە.
نێچیرڤان بارزانی سوپاس و پێزانینی بۆ ڕۆڵی دیار و یارمەتیدەرانە و هاوكارییەكانی نەتەوە یەكگرتووەكان و یۆنامی لە بوارە جیاجیاكاندا بۆ عێراق و هەرێمی كوردستان دووپات كردەوە، هەروەها ئامادەیی هەرێمی كوردستانی بۆ پێشكەشكردنی هەموو ئاسانكاری و هاوئاهەنگی و پشتگیرییەكی پێویست تا ماوەی كۆتاهاتنی ئەركیان پێشان دا.
لای خۆیەوە ئەلحەسان ستایشی نەتەوە یەكگرتووەكان و یۆنامیی بۆ هاریكاریی لایەنە پێوەندیدارەكانی هەرێمی كوردستان دەربڕی. دووپاتی لە گرنگیی پاراستنی عێراق لە كێشەكانی ناوچەكە كردەوە.
هەروەها هەردوولا چارەسەركردنی كێشەكانی هەولێر ـ بەغدا و لێكگەیشتنی نێوانیان بە پێویست زانی كە لە بەرژەوەندیی تەواوی عێراقدایە، خزمەت بە پاراستنی ئارامی و سەقامگیری و گەشەسەندنی وڵات دەكات.
چەند پرسێكی تری جێی بایەخی هاوبەش، لایەنێكی تری كۆبوونەوەكە بوو.