كەسایەتیی مەسیحی و چاودێرێكی سیاسیی رای دەگەیەنێت، عەقڵییەتی بەغدا ناوەندییە و ددان بە فیدراڵی عێراق و مافەكانی خەڵكی كوردستاندا نانێن. هەروەها دەڵێ، بەغدا شەڕی سیاسیی هەیە، پێویست ناكات دژی مووچەخۆران بیكات.
وەك شەڕێكی سیاسیی دژی هەرێمی كوردستان، زیاتر لە دوو مانگە بەغدا مووچەی فەرمانبەرانی كوردستان بڕیوە، هەرچەندە گفتوگۆ لەسەر ئاستی باڵا بۆ ئەو پرسە بەردەوامە، بەڵام بەغدا هەرجارە و بیانوویەكی جیاواز دژی كوردستان دەهێنێتەوە.
زیا پەترۆس كەسایەتی و چاودێری سیاسی، بۆ "وشە" گوتی، بەغدا شەڕی سیاسیی لە ڕێگەی مووچەی فەرمانبەرانەوە لەگەڵ كوردستان دەكات، عەقڵییەتێكی مەركەزی لە بەغدا دژی كوردستان هەیە و ئەوان ددان بە فیدراڵی و مافەكانی هەرێمی كوردستاندا نانێن.
دووپات لەوەیش دەكاتەوە كە پێویستە بەغدا بەگوێرەی دەستوور مامەڵە لەگەڵ كوردستان بكات، راستە ئێستە مووچە كێشەیە، بەڵام كێشە لەگەڵ عێراق لە مووچە گەورەترە.
پەترۆس پێی وایە كە هەڵبژاردن لە عێراقدا نزیكە و هەر كاتێكیش هەڵبژاردن هەبێت، لایەنەكانی بەغدا بەو جۆرە مامەڵە دەكەن، چونكە وایان لە خۆیان گەیاندووە لە شەقامی عێراقی ئەگەر دژی كوردستان مامەڵە بكەن، دەنگی زیاتر بەدەست دەهێنن.
زیا پەترۆس ئاماژەی بۆ ئەوەیش كرد، ئەوەی ئێستە بەغدا دەیكات دژی كەرامەتی خەڵكی كوردستانە، ئەگەر كێشەیان لەگەڵ حكوومەت هەیە، پێویست ناكات سزای مووچەخۆرانی كوردستان بدەن، بیانووی جیاواز ببیننەوە، كاتێك رێككەوتن دەكرێت دواتر بەغدا پەشیمان دەبێتەوە.
لە كۆتاشدا دووپاتی لەوە كردەوە كە بەغدا بەو كارەی دەیەوێ دۆخی كوردستان تێكبدات و ناڕەزایی لەناو خەڵك دروست بكات، بەڵام هەرگیز ئەوە بە چاوی خۆیان نابینن.
وشە/ دوێن ئەحمەد