بڕیارە لە هەفتەی داهاتوودا، دابەشكردنی زەوی لە سنووری پارێزگای هەولێر بەسەر فەرمانبەران دەست پێ بكاتەوە و ئامادەكاریی تەواو كراوە.
ئەمڕۆ چوارشەم نۆی تەمووز، زریان سەباح سەرۆكی شارەوانیی بنەسڵاوە، بە "وشە"ـی راگەیاند، سەرۆكایەتیی شارەوانیی بنەسڵاوە بەردەوامە لە تۆماركردنی ناوی ئەو فەرمانبەرانەی لە سنووری سەرۆكایەتیی شارەوانیی بنەسڵاوە سوودمەند دەبن لە وەرگرتنی زەوی.
زیاتر گوتی، قۆناغ بە قۆناغ كاركردن و داخلكردنی ناوی فەرمانبەران لە سیستمدا بەرەو كۆتایی دەچێت، بۆیە هەوڵ دەدرێت لە هەفتەی ئایندەدا دەست بكرێت بە دابەشكردنی زەوی بەسەر فەرمانبەران.
باسی لەوەش كرد، زەویی فەرمانبەران لەو سنوورە لە باشترین زەوییەكانە و فەرمانبەران دەتوانن سوودی لێ ببینن.
27ی ئایاری ئەمساڵ مەسروور بارزانی سەرۆك وەزیرانی كوردستان، بڕیاری دا زەوی بەسەر فەرمانبەرانی كوردستان دابەش بكرێت كە لە رابردوودا سوودمەند نەبوون، قۆناغی یەكەمی پرۆسەكە لە زاخۆ و گەرمیانەوە دەستی پێ كرد، دواتر هەولێر و سلێمانی گرتەوە كە هەر پارچە زەوییەك 200 مەترە.