دەما کێمتر ژ دەهـ روژان ل سێ جهێن گەشتیاری، گەشتیارێن عەرەب ب بویاغێ سیما و سروشتێ جهێن گەشتیاری ل سنورێ پارێزگەها دهۆکێ و ئیدارا زاخۆ تێکددەن، رێڤەبریەکا گەشتیاری ژی ددەت دیارکرن کو دێ پێرابوونان ل گەل کەسانێن ئەو کارە کری گرنەبەر.
محەمەد زێباری، وەلاتیەکێ دەڤەرا دێرەلۆکێ یە دیارکر کو چەند گەشتیارێن نە ناسیار کو گومان دهێتە کرن عەرەب بن، ژبەرکو ب نڤێسان و هێمایێن عەرەبی دروستکرینە، بەرێن جوان و سەرنجڕاکێش یێن گەلیێ شێرانە بویاغێ تێکداینە و گوت،
سروشتەکێ زور جوان ل گەلیێ شێرانە ل دەڤەرا ئامێدیێ هەیە، بەلێ مخابن گەشتیارێن عەرەب ناڤێن خۆ ل سەر دنڤیسن و سروشتێ وێ کرێت دکەن.
نەشوان زاخۆی، وەڵاتیەکێ زاخۆیە دیارکر کو چەند گەشتیاران دیوارێ بەرین و سروشتیێ شکەفتا بێهرێ کو ئێک ژ جهێن گەشتیاری یە ل دەرکارێ، تێکدایە و گوت، ئەڤان گەشتیاران دیوارێ بەری ب بویاغێ ناڤ و هێما لسەر نڤیسینە و ڤیدیویا خۆ ژی بەلاڤکریە، ئەڤ یەک بویە جهێ دلگرانیا وەڵاتیان و سیمایێ جهێن گەشتاری ژی تێکدایە.
ل سەر رووبارێ شین ل دەڤەرا شێلادزێ ژی چەند کەسان ل سەر جهەکێ شینواری نڤێسایە کو دکەڤیتە ئێک ژ جهێن هەرە خوش یێن گەشتاری.
رێبەر سادق، رێڤەبەرێ ناحیا دێرلوکێ دیارکر کو ئەوان ل نێزیک دۆڤچۆن ل سەر شێواندنا جهێن گەشتیاری ل دەڤەرێ کریە و گوت، جهێ دلگرانیێ یە کو هندەک ژ گەشتیاران ناڤ و هێمایێن کرێت ل سەر بەرێن جوان و رەنگین یێن جهێن گەشتیاری ل دێرلۆکێ کریە، ژ وانان گەلیێ شێرانە، ئەم نوکە بزاڤێ دکەین کو رێیەکێ ببینین وان نڤێسان و هێما راکەین، دیسان دێ دوڤچونێ ژی ل سەر وان کەسان کەین یێن ئەو هێمایە دروست کری.
بیوا سندی، بەرپرسێ راگەهاندنێ ل رێڤەبەریا گشتی یا گەشتوگۆزارا زاخۆ دیارکر کو پشتی چەند گەشتیاران ل سەر شکەفنا بێهرێ نڤێسایی، ئەوان دەست ب دوڤچون کریە و گوت، دێ پێرابونێن یاسایی ل گەل وان کەسان گرینەبەر یێن ئەو نڤێسان و هێما ل سەر شکەفتێ نڤێسایی ژبەرکو دیمەنێ شکەفتێ و جهێ گەشتیاری تێکدایە.
ل سنورێ پارێزگەها دهۆکێ پتری 900 جهێن گەشتیاری هەنە، پرانیا وان ژی سروشتی نە و پێکدهێن ژ سیلاڤ و داروبار ئاڤێن جوان، تێکدانا وان دبیتە جهێ دلگرانیا گەشتیاران و شێواندنا وان جهان.
دهۆک، نەوزاد هلۆری: