ب مەرەما پێشڤەبرنا کەرتێ گەشتیاری و جوانکرنا دەڤەرێ و بێهنڤەدانا وەلاتیان، کار لسەر چێکرنا کورنیشەکێ ب کوژمێ پتری چوار ملیار و 500 ملیون دیناران ل شێلادزێ ل دەڤەرا ئامێدیێ دهێتەکرن.
فەرسەد ریکانی، سەرپەرشتێ چێکرنا پرۆژێ کورنیشی شێلادزێ بۆ وشە گوت، کورنیشێ شێلادزێ یان کورنیشێ رووبارێ شین کو ل ناحیا شێلادزێ یا سەر ب قەزا ئامێدیێ دهێتەچێکرن کار تێدا بەردەوامە و نوکە کار د چێکرنا بەنداڤا وێ دا دهێتە کرن و چەندین کارێن دی یێن جودا جودا کو ژلایێ کومپانیا شاهوارڤە دهێتە جێبەجێکرن.
زێدەتر گوت، پرانیا کارێن پروژەی هاتینەکرن و راستەوخۆ ژلایێ ئەندازیار و بسپورێن رێڤەبەریا گشتی یا باژێرڤانیان ل دهۆکێ دهێتە بجهئینان، کوژمێ پرۆژەی چوار ملیار و 520 ملیون دینار ژلایێ حکومەتا هەرێما کوردستانێ بۆ هاتینە تەرخانکرن، ئەگەر چ کێشە دروست نەبن، دەمەکێ نێزیک دێ کەڤنە د خزمەتا خەلکێ دەڤەرێ دا و هەند خەلک تێدا کار دکەن و دەلیڤا کاری بۆ سەدان خەلکی هاتیە دابینکرن، هەند ژی دێ روویەکێ جوان یێ گەشتیاری دەت دەڤەرێ.
رووبارێ شین ل باکورێ کوردستانێ دهێتە دناڤ ئاخا هەرێما کوردستانێ و دەستپیکا وێ ژی ل دەڤەرا ئامێدیێ یە، ب دیارکری ل ناحیا شێلادزێ، هژمارەکا زور یا خەلکی سەرەدانێ بۆ دکەن بۆ گەشتوگۆزار و سەیران.