سەرۆكایەتیی شارەوانیی هەریر رای گەیاند، دروستكردنی ئاوەڕۆ، نۆژەنكردنەوە و قیرتاوكردنەوەی شەقامیان دەست پێ كردووە و دەڵێن، ئەمە یەكێكە لە پڕۆژە گرنگەكانی سنوورەكە.
بەپێی راگەیەنراوی شارەوانیی هەریر، پڕۆژەكە بریتییە لە دروستكردن و دانانی ئاوەڕۆ و نۆژەنكردنەوەی شەقام، دووبارە قیرتاوكردنەوەی شەقامەكان لە رێگە‌ی گەلی خانزاد لە نزیك فەرمانگەی كارەبای هەریر و فولكەی خانزاد.
راگەیەنراوەكەی وەزارەتی شارەوانی و گەشتوگوزار ئاماژەی بەوەش كردبوو، ئەو پڕۆژەیە لەسەر بودجەی شارەوانی هەولێر و بە سەرپەرشتیی تیمە ئەندازیارییەكانی بەڕێوەبەرایەتیی گشتیی شارەوانییەكانی هەولێر و سەرۆكایەتیی شارەوانیی هەریر، جێبەجێ دەكرێت.
جگە لەو پڕۆژەیەش، ئێستە لە سنووری بەڕێوەبەرایەتیی گشتیی شارەوانییەكانی هەولێر (دەوروبەری هەولێر)، ژمارەیەك پڕۆژەی هەمەجۆری خزمەتگوزاری لە قۆناغی جێبەجێكردندان و بەپێی پلانی شارەوانیش، پڕۆژەی نوێ جێبەجێ دەكرێن.