بەبۆنەی سێیەم ساڵوەگەڕی ژیانئاوایی ژینا ئەمینی، باوی ژینا پەیامێكی بڵاو كردەوە و رای گەیاند، هەرگیز نە ژینا و نە دۆسیەكەی لە بیر ناكەین.
ئەمجەد ئەمینی باوكی ژینا، لە ستۆری ئینستاگرامەكەی خۆی نووسیویەتی، بەناوی خوڵقێنەری جوانی و ژیان، رەنگە ئاسمان كوژانەوەی ئەستێرەیەك و زاگرۆس وشكبوونی لێوەكانی كانییەك، یان سووتانی باڵای داربەڕووە خوێناوییەكانی لە بیر بكات، رەنگە دەریا بەتاڵانبردنی یاقووتەكانی قووڵایی ناخی، كوێستان پەڕپەڕبوونی گوڵاڵەسوورەكانی لە بیر بكات، بەڵام هەرگیز كوردستان و ئێران، سیسبوون و وشكبوونی جوانی و زەردەخەنەی گوڵەكانی فەرامۆش ناكات”.
دەقی پەیامەكەی باوكی ژینا:
بەناوی خوڵقێنەری جوانی و ژیان
بەبۆنەی ساڵیادی شەهیدبوونی مەهسا، ژینای لەبیرنەكراوی كوردستان و ئێران.
رەنگە ئاسمان كوژانەوەی ئەستێرەیەك و زاگرۆس وشكبوونی لێوەكانی كانییەك، یان سووتانی باڵای داربەڕووە خوێناوییەكانی لە بیر بكات، رەنگە دەریا بەتاڵانبردنی یاقووتەكانی قووڵایی ناخی، كوێستان پەڕپەڕبوونی گوڵاڵەسوورەكانی لە بیر بكات، بەڵام هەرگیز كوردستان و ئێران، سیسبوون و وشكبوونی جوانی و زەردەخەنەی گوڵەكانی فەرامۆش ناكات.
ئێمەش هەرگیز یادی پەپوولەكانی خەندە لەسەر لێوی گوڵی ژیانمان، ژینای هیوامان فەرامۆش ناكەین.
تێپەڕبوونی رۆژ، مانگ و ساڵە سەختەكان، هەرگیز ناتوانێت یاد و بیرەوەری و دۆسیەی ژینای ئازیز و هەموو شەهیدەكانمان لە ژیانماندا بسڕێتەوە.
خەمی لەدەستدانی ئازیزەكەمان، وەك گڕكانێك لە قووڵایی ناخمان بڵێسە دەكات و دەمێنێتەوە.
ژن مایەی ژیانە و ژیانیش بێ ئازادی كۆیلایەتییە.
وەك شاعیری كورد، پیرەمێرد دەڵێ:
پێی ناوێ بۆ شەهیدی وەتەن شیوەن و گرین
نامرن ئەوانەی وا لە دڵی میللەتا ئەژین.
باوكی ژینا، كوردستان، سەقز
15.9.2025