كونسوڵگەی ئەمەریكا لە هەولێر، پێشوازی لە چاكسازییەكانی پێشمەرگە دەكات و رای گەیاند، یارمەتیدەر دەبین لە دروستكردنی ھێزێكی سەربازیی پیشەیی و یەكگرتوو.
ئێوارەی دوێنێ كۆبوونەوەیەكی باڵا لە نێوان وەزارەتی پێشمەرگە و بەرپرسانی ئەمەریكا، لە سەرۆكایەتی هەرێم لەبارەی چاكسازی و رێكخستنەوە و یەكگرتنەوەی پێشمەرگە كرا.
ئەمەریكا سوورە لەسەر ئەوەی هێزی پێشمەرگەی كوردستان رێكبخرێتەوە، وەك كونسوڵگەی ئەمەریكا لە هەولێر ئەمڕۆ 17ی ئەیلوول ئاماژەی پێ داوە، "لە دروستكردنی ھێزێكی سەربازیی پیشەیی و یەكگرتوو هاوكار دەبین".
كونسوڵگەكە دەڵێت: كونسوڵی گشتیی "گرین" بەشداری كرد لە كۆبوونەوەی بەرپرسە باڵاكانی ویلایەتە یەكگرتووەكانی ئەمەریكا و ھەرێمی كوردستان، بۆ ھەڵسەنگاندنی بەرەوپێشچوونەكانی یاداشتی لێكتێگەیشتنی ساڵی 2022، بەشداربووان بە بەرەوپێشچوونەكانی چاكسازی پێشمەرگەدا چوونەوە و لەسەر ھەنگاوەكانی داھاتوو ڕێككەوتن، بۆ دڵنیابوون لە جێبەجێكردنی ھەموو خاڵەكانی یاداشتەكە بە ئامانجی دروستكردنی ھێزێكی سەربازیی پیشەیی و یەكگرتوو.
كونسوڵگەی ئەمەریكا لە هەولێر باسی لەوەش كردووە، ھەردوولا دووپاتیان لەسەر پابەندبوونیان كردەوە بە ھەوڵەكانی چاكسازی لە ھێزەكانی پێشمەرگەدا.
ویلایەتە یەكگرتووەكانی ئەمەریكا، پشتگیریی ھەرێمی كوردستان دەكات كە ناوچەیەكی سەلامەت و پارێزراو و گەشەسەندووتر دروست دەكەن بۆ ھەمووان.