لە كۆبوونەوەی ئەمڕۆی ئەنجوومەنی وەزیرانی كوردستان، مەسروور بارزانی، سەرۆك وەزیرانی کوردستان دووپاتی لە چارەسەركردنی كێشەكان كردەوە و رای گەیاند، هەموو ئەرك و پابەندییە دەستوورییەكانمان بە زیادەوە جێبەجێ كردووە.
ئەمڕۆ چوارشەم، 17ی ئەیلوولی 2025، كۆبوونەوەی ئەنجوومەنی وەزیرانی كوردستان بەڕێوەچوو، لەوێ، مەسروور بارزانی، سەرۆك وەزیرانی كوردستان گوتی، حكوومەتی هەرێمی كوردستان، هەموو ئەرك و پابەندییە دەستوورییەكانی بە زیادەوە جێبەجێ كردووە، هەموو نەرمییەكی نواندووە بۆ نەهێشتنی هەموو ئەو كێشە و ئاستەنگ و بەربەستە تەكنیكییانەی كراونەتە بیانوو بۆ نەناردنی مووچە.
دووپاتی لەوەیش كردووەتەوە، نابێت چیتر ئەم بابەتانە ببنە ڕێگر لە بەردەم خەرجكردنی مووچەی مووچۆخۆرانی هەرێمی كوردستان، كە مافێكی یاسایی و ڕەوای خۆیانە مووچەكانیان لەلایەن حكوومەتی فیدراڵەوە بنێردرێت.
ئەوەی پێوەندی بە ناوەڕۆكی كۆبوونەوەكە هەبوو ئەوەیە: تەواوی نەوتی بەرهەمهاتووی هەرێم ڕادەستی كۆمپانیای سۆمۆ بكات (جگە لە بڕی بەكارهێنانی ناوخۆ)، ئەم قۆناخەش لەسەر واژۆكردنی ڕێككەوتننامەی سێقۆڵی بۆ هەناردەی نەوت وەستاوە، بەڵام دانوستانەكان بەرەوپێشچوونی باشیان بەخۆیانەوە بینیوە و وا چاوەڕوان دەكرێت، لە كۆتایی ئەم هەفتەیە، ئەو ڕێككەوتننامەیە گەڵاڵە بكرێت.
تا كاتی واژووكردنی ڕێككەوتننامەی سێقۆڵیش، هەرێمی كوردستان بەشەنەوتی خۆی ڕادەستی وەزارەتی نەوتی فیدراڵ دەكات.