بەیانی ئەمڕۆ سەرۆكی حكوومەتی هەرێمی كوردستان چووە بنكەی دەنگدان و دەنگی دا.
ئەمڕۆ سێشەم 11ـی تشرینی دووەم، مەسروور بارزانی سەرۆكی حكوومەتی هەرێمی كوردستان، لە پیرمام سەردانی بنكەی دەنگدانی كرد و دەنگی خۆی دا.
مەسروور بارزانی دوای دەنگدان رای گەیاند، ئەمڕۆ ڕۆژی بڕیاری خەڵكە.
زیاتر گوتی، هیوادارم خەڵكێكی دڵسۆز بنێرنە پەرلەمان بۆ ئەوەی داكۆكی لە مافە دەستوورییەكانی هاووڵاتییان بكەن.
باسی لەوەش كرد، هەڵبژاردنێكی گرنگە، چونكە بڕیاری ئەمڕۆی خەڵك ڕێڕەو و شێوازی حوكمڕانی چوار ساڵی داهاتوو دیار دەكات.
بۆ خولی شەشەمی ئەنجوومەنی نوێنەرانی عێراق و بەپێی نوێترین ئاماری كۆمسیۆنی باڵای سەربەخۆی هەڵبژاردنەكانی عێراق، بۆ پرۆسەی دەنگدانی گشتی 20 ملیۆن و 63 هەزار و 773 كەس مافی دەنگدانیان هەیە، دەنگدەران بەسەر هەشت هەزار و 703 بنكە و 39 هەزار و 285 وێستگەدا دابەش بوون.
ژمارەی ئەو كەسانەی لە هەرێمی كوردستان مافی دەنگدانیان هەیە، سێ ملیۆن و 68 هەزار و 411 كەسن، دەنگدەرانی هەرێمی كوردستانیش رێژەی 14٪ـی كۆی دەنگدەرانی عێراق پێكدەهێنن.
ژمارەی دەنگدەران بەم شێوەیە بەسەر پارێزگاكانی هەرێمی كوردستان دابەش بوونە، لە هەولێر ملیۆنێك و 87 هەزار و 880 كەس مافی دەنگدانی هەیە، لە سلێمانی بە هەڵەبجە و گەرمیان و راپەڕینەوە، ملیۆنێك و 210 هەزار و 658 كەس مافی دەنگدانیان هەیە، لە دهۆك 778 هەزار و 846 كەس مافی دەنگدانیان هەیە.