رێكارەكانی خۆپارێزی لە لافاو بۆ هاووڵاتییانی هەرێمی كوردستان گرنگیی زۆری هەیە، "وشە" بەشێك لە رێكارەكانی وڵاتانی پێشكەوتوو بڵاو دەكاتەوە.
لە زۆرینەی وڵاتان لافاو ئەگەری روودانی هەیە، بۆیە وڵاتان هەمیشە خۆیان بۆ ئەو رووداوە سروشتییە ئامادە دەكەن.
ئامۆژگاریی حكوومەتەكان بۆ هاووڵاتییانیان بەگشتی بەم شێوەیەیە: لە كاتی هاتنی باران بە هیچ شێوەیەك لە ئاو مەپەڕنەوە. دوور بكەونەوە لە شیو و دۆڵەكان كاتێك رەشەبا و باران روو دەدات.
لافاو خێرا زیاد دەكات و چاوەڕێ مەكەن تا ئاو بەرز دەبێتەوە، دەستبەجێ لە ناوچە نزمەكان دوور بكەونەوە، لەو شەقامانەدا لافاویان تێدا دروست بووە شۆفێری مەكەن.
ئەگەر ماڵەكەتان لە شوێنی مەترسیدایە، ئەگەری هەیە بەر لافاو بكەون، لە كاتی مەترسیدا دەبێت چۆڵیان بكەن. پاككردنەوەی سەربان و حەوشە لە گەڵا و عەلاگە و مقەبا، تا لە كاتی باراندا نەچنە بەردەم مەنهۆڵ و گونجەكان.
پارەی نەختینە، دەرمان و پێداویستی فریاگوزاری سەرەتایی و پۆشاكی پێویست، لەگەڵ بەڵگەنامە گرنگەكان بە پارێزراوی بهێڵنەوە و ئەو شوێنانە دیاری بكەن كە دەتانەوێت لە ئەگەری لافاودا بۆیان بڕۆن.
كە بینیتان لافاو دروست بووە، دەستبەجێ كارەبا و ئاوی ماڵەكەتان ببڕن، چونكە ئەگەری روودانی تەقینەوە یان گڕگرتن لە كاتی لافاودا زۆرە. لە كاتی پێشبینی روودانی لافاودا، چاودێریی هەواڵەكان بكەن تا خێراتر ئاگاداری گۆڕانكارییەكانی بڵاوبوونەوەی لافاو بن لە ناوچەكەتاندا لە پێناو سەلامەتیتان.
هاووڵاتییان پێویستە لە ئەگەری دروستبوونی لافاودا بە خێرای پێوەندیی بكەن بە ژمارەی ژووری فریاگوزارییەوە، تا بە زووترین كات بتوانرێت تیمەكانی بەرگریی شارستانی بگەیەنرێتە ناوچەكە.