مەلایەكی بەناوبانگی كوردستان، روو لە سەرجەم ناوەند و لایەنە ئیسلامییەكان دەكات كە بەپەلە فەتوایەكی بدەن، بەرانبەر فەتواكەی سووریا كە ئەنفالی كوردیان حەڵاڵ كردووە، بۆ ئەوەیش دەنگ هەڵبڕن.
ئەمڕۆ سێشەم 20ـی كانوونی دووەم، دكتۆر ئیدریس كاریتانی مەلا و زانای ئاینی كورد، بە "وشە"ـی راگەیاند، پێویستە سەرجەم زانایانی سەربەخۆ، مامۆستایانی ئاینی و ڕێبەرانی تەریقەت و ڕێبازە جیاوازەكانی (سەلەفی، سۆفی و مەكتەبە فیقهییەكان) هەڵوێستی شەرعی بەرانبەر بە فەتوای تەكفیركردنی نەتەوەی كورد دەرببڕن.
زیاتر گوتی، وەك ئاگادارن وەزارەتی ئەوقافی حكوومەتی كۆماری عەرەبی سووریا، لە كارێكی مەترسیدار و دوور لە هەموو پرەنسیپێكی ئیسلامی، فەتوای كافربوونی نەتەوەی كوردی داوە. لەم فەتوایەدا پەنایان بۆ ئایەتەكانی "سوورەتی ئەنفال" بردووە، ئەم ئایەتە لە غەزوی بەدردا بۆ بەرەنگاربوونەوەی كافرانی قوڕەیش دابەزیوە، بەڵام ئێستە وەك چەكێكی تەكفیر دژی گەلێكی مسوڵمان بەكاری دەهێنن.
باسی لەوەش كرد، ئەم هەنگاوە تەنیا لێدوانێكی سیاسی نییە، بەڵكو هاندانی ڕاستەوخۆیە بۆ كوشتار و خوێنڕشتن لە ژێر ناوی "نەسر و فەتح"، داوای تەكبیرلێدان لە مزگەوتەكان دەكەن دژی كورد. ئەم چەواشەكارییە شوناسی ئیسلامیی هەزار ساڵەی گەلی كورد دەخاتە ژێر پرسیار و لەناو گەلانی ناوچەكەدا وێنەیەكی شێوێنراو لەسەر كورد دروست دەكات.
دەشڵێت، كورد لە سەردەمی پێغەمبەرەوە (صلی اللە علیە وسلم) مسوڵمان بووە و هەرگیز لە ئاینەكەی هەڵنەگەڕاوەتەوە؛ ئێمە نەوەی سەڵاحەدینی ئەیووبین. بێدەنگیی ئێوە لەم كاتەدا، وەك ددانپێدانان بە ڕاستی كفركردنی كورد لە قەڵەم دەدرێت و دەبێتە سەرەتایەك بۆ كارەساتێكی مرۆیی گەورە.
ئاماژەی بەوەش كرد، لە بیرتان نەچێت، كاتێك ڕژێمی پێشووی عێراق (182 هەزار) كوردی ئەنفال كرد، بە هەمان پاساوی ئاینی و بە هەمان سوورەتی ئەنفال دەستی پێ كرد. ئەگەر ئەمڕۆ سوپای سووریا وا هەست بكات فەتوایەكی ئاینی لە پشتە، مێژووی خوێناوی ئەنفال دووبارە دەبێتەوە و هەرێمی كوردستانیش دەكەوێتە ژێر هەڕەشەیەكی رژدەوە.
لە بەشێكی قسەكانی رای گەیاند، پێویستە زانایان بە ڕەسمی و بە دەنگێكی دلێر وەڵامی ئەم فەتوایە بدەنەوە و پووچی بكەنەوە، هەروەها پێوەندی بە ناوەندە ئیسلامییە جیهانییەكان (ئەزهەر، یەكێتیی جیهانی زانایان و هتد) بكەن بۆ ڕێسواكردنی ئەم فەتوا شۆڤێنییە، لە هەمان كاتدا ڕای گشتی جیهانی ئیسلامی ئاگادار بكەنەوە كە كورد نەتەوەیەكی مسوڵمانە و ئەم فەتوایانە تەنیا بۆ مەرامی سیاسی و پاكتاوی ڕەگەزییە، بۆیە هەڵوێستی ئەمڕۆ، پارێزگارییە لە خوێنی میلەتێك و پاراستنی پیرۆزییەكانی ئاینی پیرۆزی ئیسلام لە دەستی سیاسییە شۆڤێنییەكان.