بەرەبەیانی ئەمڕۆ بە درۆن هێرش كرایە سەر بارەگایەكی پارتی ئازادی كوردستان، بەپێی زانیارییەكان هێرشەكە لە رێگەی درۆن بووە و شەهیدێك و بریندارێك هەیە.
ئەمڕۆ چوارشەم 21ـی كانوونی یەكەم، پەیامنێری "وشە" لە كەركووك پێی راگەیاندین، بەرەبەیانی ئەمڕۆ لە رێگەی درۆن و مووشەكەوە، هێرش كرایە سەر بارەگایەكی پارتی ئازادی كوردستان (PAK) لە چەمشار رێگەی دهۆك.
ئەوەش زانراوە، سەرەتا بە درۆن هێرش كراوە و دواتر بە مووشەكێك هێرش كراوەتە سەر بارەگاكە. دوای ئەوە درۆنێكی تر لێی داون، بەڵام نەتەقیوەتەوە.
لە ئەنجامی هێرشەكەدا شەهیدێك و بریندارێك هەن، ئێستە بریندارەكە گواستراوەتە نەخۆشخانە، بەڵام بەشێكی زۆری جەستەی سووتاوە.
لەبارەی هێرشەكەدا پارتی ئازادیی كوردستان راگەیەنراوێكی بڵاوكردووەتەوە و ئاماژەی داوە، ئێران هێرشەكەی ئەنجام داوە و بارەگایەكی سوپای میلیی كوردستانی بە درۆن و مووشەك كردووەتە ئامانج، بەهۆیەوە ئەندامێكیان بە ناوی مزەفەر محەممەد ساڵح ناسراو بە (نەبەز) شەهید بووە.