ئەندامێكی كۆنسەی بەڕێوەبەریی كەجەكە رای گەیاند، هێرشەكانی سەر ڕۆژئاوای كوردستان، بۆ تێكدان و ڕێگریكردنە لە پرۆسەی ئاشتی، ئەم هێرشە بۆ سەر هەموو گەلی كورد و دەستكەوتەكانیەتی، نایانەوێت كورد لە ڕۆژهەڵاتی ناوەڕاستدا ستاتۆیەكی هەبێت.
مستەفا قەرەسوو ڕای گەیاند، پڕۆژەیەكی وا هەیە كە رێگریی لە دەركەوتنی كورد لە دنیای نوێ بكەن كە هیچی دەست نەكەوێت، توركیاش بەشێكە لەمە، دەشڵێت: گەل یەكێتیی خۆی هێناوەتە دی، بەرپرسیارێتیی هەموو هێزە سیاسییەكان ئەوەیە كە ئەو یەكێتییە نەتەوەییە لە ڕووی سیاسییەوە جێبەجێ بكەن.
ئەندامی كۆنسەی بەڕێوەبەریی كەجەكە مستەفا قەرەسوو، لە میانی بەشداریكردنی لە بەرنامەیەكی تایبەتی تەلەڤزیۆنی (مەدیا خەبەر)ـدا گوتی، 11 مانگ بەسەر بانگەوازەكەی ڕێبەر ئاپۆ بۆ "ئاشتی و كۆمەڵگەیەكی دیموكراتیك لە 27ـی شوباتی 2025 تێپەڕیوە، ماوەیەكی كەم نییە، هەروەها پێش ئەوە شتی تر هەبوو، پێش ئەوە، باخچەلی بانگەوازی كرد، پاشان ئۆجەلان ڕای گەیاند كە دەتوانێت پرۆسەی شەڕی 50 ساڵە و 100 ساڵە بگوازێتەوە بۆ زەوینەیەكی یاسایی و سیاسی، بەڕاستی هەنگاوی ڕادیكاڵی لەم بابەتەدا ناوە، ئێمەش بەگوێرەی بانگەوازی ئەو بڕیاری گرنگمان دا، هەنگاوی گرنگمان ناوە".
"پەكەكە هەموو كار و چالاكییەكی لە ژێر ناوی خۆیدا كۆتایی پێ هێنا، تێكۆشانی چەكداریمان لە دژی توركیا ڕاگرت، هەوڵمان دا كێشەكان لەگەڵ توركیا بە ڕێگەی ماقووڵ چارەسەر بكەین، گەلی ئێمەش پشتیوانی ئەم بانگەوازەیان كرد، هەروەها وەڵامی ئەرێنیمان دایەوە بۆ سەركەوتنی ئەم بانگەوازە، چ لە ڕووی دروستكردنی ڕای گشتیی كوردەوە و چ بە هەڵوێست و ڕوانگەی خۆمان، پاشان چەكەكان سووتێنران و هەڤاڵان لە باكور كشانەوە، ئەوانیش ڕاگەیەنراویان هەبوو، بەم جۆرە تا ئاستێكی بەرز بەرپرسیارێتیی خۆمان جێبەجێ كرد."
قەرەسوو گوتی، بەڵام دەوڵەتی تورك هەڵوێستی چی بوو؟ هەندێك كۆبوونەوە ئەنجام دران، بۆ ئەوەی پەیامەكانمان بگات بە ڕێبەرێتی، پەیامەكانی ڕێبەریش بگاتە ئێمە، گۆشەگیری تا ئاستێك هەڵگیرا، پارێزەران جارێك چوونە ئیمراڵی، بنەماڵە چوون، بەتایبەت شاندەكان چوون؛ بەڵام ئەم هاتوچۆیە ئەنجامی ئەوتۆی لێ نەكەوتەوە.
ئەو بەرپرسەی پەكەكە دەڵێت: ئێستە هێرش دەكرێتە سەر ڕۆژئاوا، هێرش بۆ سەر هەموو هەرێمە كوردنشینەكان، ئەمەش لە خۆیدا هەڵوێستێكی نارژدە بەرانبەر پرۆسەكە، تێكدان و ڕێگریكردنە لە پرۆسەكە، بەم واتایە دێت، هەمووان دەڵێن، چۆن ئاشتی لە ناوخۆی سووریا بە دوژمنایەتی بەرانبەر كورد بەدی دێت؟ بۆیە ئەو مامەڵەیە لە ڕۆژئاوا نیگەرانیی دروست دەكات كە لەمەودوا پرۆسەكە چۆن دەبێت.
ئێمە دەزانین ئۆجەلان دوو پەیامی بۆ رۆژئاوای كوردستان نارد، بەڵام پەیامەكان سەپاندن نییە، بە واتایەكی تر ڕوانگەیەكی یەكگرتوو دەگرێتە خۆ بۆ دیموكراتیكبوون، بەڵام بە هێرشەكە وەڵامی بانگەوازی ڕێبەرێتی درایەوە، بانگەوازەكانی ڕێبەرێتی لەبەرچاو نەگیرا، باكور و ڕۆژهەڵاتی سووریا و هەسەدە و ئیدارەی ئەوێ، بانگەوازی ڕێبەرێتییان لەبەرچاو گرت، ئەگەر ڕێگەیان بە ڕێبەرێتی بدایە، دەیتوانی كێشەكان بەشێوەیەكی ماقووڵ و دوور لە شەڕ چارەسەر بكات.
قەرەسوو ئەوەی گوتووە، هێرش بۆ سەر ڕۆژئاوای كوردستان بەدیوێكدا هێرشە بۆ سەر پرۆسەكە، شێواندنی پرۆسەكەیە، چۆن ڕوو دەدات؟ ئێوە پرۆسەیەك ئەنجام دەدەن، لەگەڵ ئیمراڵی پرۆسەیەك ئەنجام دەدەن، بێگومان ئێمەش لەناو ئەم كارەداین، وەك تەڤگەر ئێمەش لەناو ئەم پرۆسەیەداین، كار و چالاكییەكانمان لە ژێر ناوی پەكەكەدا كۆتایی پێ هێنا، تێكۆشانی چەكداریمان ڕاگرت، ئەوەندە هەنگاومان ناوە، گەریلاكانمان لە ناوخۆی توركیا كشاندەوە، بەڵام دەوڵەتی تورك هەڵوێستێكی ئەرێنی لەم ڕووەوە پێشان نەدا.
لەبارەی خۆپێشاندان و هەڵویستی هێزە سیاسییەكانی باشووری كوردستان قەرەسوو دەڵێت: ئێمە هەڵوێستی گەلی باشوورمان زۆر هێژا بینی، لە سلێمانی و هەولێریش خەڵك بەردەوام لەسەر پێیە، ئەوروپاش بەردەوام لەسەر پێیە، لە باكوریش لەسەر پێیە، كورد هەموو بۆ ئەم دۆخە ئامادەن.