ب مەرەما باشترکرنا رەوشا توشبویێن نەخوشێن پەنجەشێرێ، حکومەتا هەرێما کوردستانێ هەموو پێنگاڤ هاڤێتینە، بەلێ هەتا نوکە حکومەتا عیراقێ چ بۆ نەخوشێن پەنجەشێرێ نەکریە، زێدەباری کو ل پارێزگەها دهوکێ هزار و 500 نەخوشیێن پەنجەشێرێ هەنە.
د. ئەفراسیاب موسا، رێڤەبەرێ گشتیێ ساخلەمیا پارێزگەها دهۆکێ دیارکر کو نوکە کار ل سەر ئاڤاکرنا سەنتەرێ چاندنا مەژیێ هەستی ل دهۆکێ دهێتەکرن بۆ نەخۆشێن پەنجەشێرێ و گوت، دەمەکێ نزیک نەخوشخانا ناڤبری ب هەموو خزمەتێن خوڤە، دێ کەڤیتە دخزمەتا نەخۆشان دا، ل نەخۆشخانا هیڤی یا زارۆک ژی پشکا پەنجەشێرێ هاتیە بەرفرەهکرن و بووینە 45 تەخت، دیسان دەست ب چێکرنا نەخۆشخانا تیشک ل پارێزگەها دهۆکێ هاتیە کرن و دێ پتر خزمەتا نەخۆشان هێتەکرن، نەخۆشخانا ئومێد یا چارەسەریا نەخۆشیێن پەنجەشێرێ ل دهۆکێ خزمەتەکا باش بۆ نەخۆشان دکەت.
ناڤبری دیارکر ژی کو حکومەتا هەرێما کوردستانێ پارەکێ مەزن بۆ نەخۆشان دمەزێخیت و سندوقا پەنجەشێرێ ژێ پشتەڤانیەکا باش بۆ نەخوشان دکەت و گوتژی، مخابن هەتا نوکە حکومەتا عێراقێ نەشیایە خزمەتان بێ بەرامبەر پێشکیش نەخوشان بکەت، سەرەرایێ کو بودجەکا مەزن بەغدا هەیە، بەلێ نەشیایە وەسا خزمەتان دابین بکەن، ب هەول و بزاڤێن حکومەتا هەرێمێ نوکە گەلەک نەخۆش چارەسەر بووینە و دەست ب ژیانا خۆ یا نورمال کریەڤە، نەخۆشخانا ئومێد ب هژمارەکا کێم پەرستاران شیایە خزمەتەکا مەزن ئەنجام بدەت داخوازا دابینکرنا ستافی دکەین و هیڤیدارین نەخۆشخانا پەنجەشێرێ تەمام بیت بکەڤتە دخزمەتا خەلکێ دا.
د. چەکدار ئەحمەد، رێڤەبەرێ نەخۆشخانا ئومێد یا چارەسەریا نەخۆشیێن پەنجەشێرێ دیارکر کو پێشکیشکرنا خزمەتێن ساخلەمیێ بۆ نەخۆشیێن پەنجەشێرێ کارەکێ هەری گرنگە بۆ نەخوشخان و گوت ب هەڤکاری و پشتەڤانیا حکومەتا هەرێما کوردستانێ بێ بەرامبەر خزمەتێن ساخلەمیێ بۆ نەخۆشان هێنە دابینکرن، نوکە ل پارێزگەها دهۆکێ ل گەل ئیدارا سەربەخویا زاخۆ، هزار و 500 نەخۆش هاتینە تۆمارکرن و چارەسەریان بێ بەرامبەر وەردگرن.
ل ئێتێت نەخوشخانەکا مودێرن و پێشکەفتی بۆ نەخوشیێن پەنجەشێرێ دهێتە چێکرن، هەڤدەم حکومەت سالانە ژمارەکا نەخوشان رەوانەی دەرڤە دکەت بۆ وەرگرتنا جارەسەریان.