بۆ كەمكردنەوەی گوشاری خوێندن لەسەر قوتابیان و پشووی زیاتر بۆ مامۆستیان لە مانگی رەمەزان، زانكۆی سەڵاحەدین بڕیاری دا.
ئەمڕۆ سێشەم 17ـی شوبات، سامان عەبدوڵا بەڕێوەبەری راگەیاندنی زانكۆی سەڵاحەدین، بە "وشە"ـی راگەیاند، دەوامی فەرمانبەران و قوتابییانی زانكۆی سەڵاحەدین لە مانگی ڕەمەزان رێكخرایەوە.
زیاتر گوتی، بڕیاری درا دەوامی فەرمی فەرمانبەران سەعات هەشت و نیوی بەیانی بۆ سەعات یەكی دوای نیوەڕۆ كەم بكرێتەوە.
روونی كردەوە، لەبارەی دەوامی قوتابیان بەپێی خشتەی كۆلێژ و بەشەكان، قوتابیان وانەكانیان دەخوێنن.
ئەوە لە كاتێكدایە بۆ فەرمانبەران بڕیار دراوە، سەعاتێك دەوام كەم بكرێتەوە و تا كۆتایی مانگی رەمەزان بەردەوام بێت.