لۆگۆی نوێی هاوپەیمانی هێزە سیاسییەكانی رۆژهەڵاتی كوردستان لە تۆڕە كۆمەڵایەتییەكان قسەوباسێكی زۆری لەسەر كرا، بەپێی زانیارییەكان مێژووی ئەم لۆگۆیە دەگەڕێتەوە بۆ سەتان ساڵ پێش زاین، ئاماژەیە بە فەلسەفە و دنیابینی هوری و میترایی و تا ماد و هخامنشی بەكار هێنراوە.
دوێنێ دووشەم كۆبوونەوەی هاوپەیمانیی هێزە سیاسییەكانی كوردستانی ئێران بەڕێوە چوو. لەو كۆبوونەوەیەدا كۆمەڵێك باس و بابەتی پێوەندیدار بە كاروباری بەڕێوەبەریی هاوپەیمانی تاوتوێ كران و بڕیاریان لەسەر درا.
لەو كۆبوونەوەیەدا بارودۆخی سیاسیی ئێران و كوردستان، دەرەنجامەكانی شەڕ و ڕەوتی گۆڕانكاری و پێشهاتە سیاسییەكان هەڵسەنگێنرا و بۆ چەند ئەركێكی هاوپەیمانی بڕیار وەرگیرا.
بابەتی ئایننامەی ناوخۆیی هاوپەیمانی، پەسندكردنی لۆگۆی هاوپەیمانی، خاڵە جەوهەرییەكان بۆ ڕاییكردنی كاروباری مەیدانیی هاوپەیمانی لە قۆناغی گوزار و چەند و چۆنیی دیپلۆماسی و چۆنیەتیی دەركەوتنی هاوپەیمانی لە دەرەوەی وڵات، چەند تەوەرێكی تری باسەكانی ئەم كۆبوونەوەیە بوون.
دوا بەشی كاری كۆبوونەوەكە ڕاگواستنی بەرپرسایەتیی دەورەیی هاوپەیمانی بوو.
مەحموود شێرزاد كە كۆمەڵناسی خوێندووە و ئێستە یەكێكە لە مامۆستا دیارەكانی یۆگا لە سلێمانی، چەند نیشانەناسییەكی كورتی لۆگۆی هاوپەیمانی بزووتنەوەی رزگاریخوازیی رۆژهەڵاتی كوردستان كردووە.
مەحموود دەڵێت: ئەم لۆگۆیە لە رووی سیاسییەوە بە مانای یەكگرتن و ئازادی و دادپەروەری و ژیان و ئاوەدانی دێت، بەڵام لە كوێوە هاتووە؟ مێژووی ئەم لۆگۆیە دەگەڕێتەوە بۆ سەتان ساڵ پێش زاین، ئاماژەیە بە فەلسەفە و دنیابینی هوری و میترایی و تا ماد و هخامنشی بەكار هێنراوە، بە گشتی ئاماژەیە بە زانست و مەعریفە و دنیابینی گەردوونیی زاگرۆس، ئێستە نموونەیەكی لە ئەشكەوتی قزقاپان لە چەمی رێزان لە شاری سلێمانی ماوە.
باسی لەوەش كردووە، ئەم لۆگۆیە چەند مانایەكی هەیە، یەكەمیان ئاماژەیە بە بنەڕەتی دنیای مادی كە رووناكییە، دووەمیان ئاماژە بە شێوازی سووڕانی یاسا گەردوونی و سروشتییەكان كە بە زمانی سانسكریتی پێی دەڵێن یاسای (دهارما)، ئەم یاسایەی كە ئەم ژیانەی لەسەر وەستاوە، ئەم لۆگۆیە دەستەخوشكی لۆگۆی دهارمای ڤیدایی و لۆگۆی سڤاستیكا و چاكرایە كە ئێستە لە ئاڵای هیندستاندایە، ئەو سەردەمەی ئەم لۆگۆیانەی تێدا هاتووەتە ئاراوە، سەردەمی خۆناسیی و بوونناسی بووە و ئەم مەعریفەیەش لە زاگرۆسەوە بەرەو هیند و ئاسیا و رۆژئاوا رۆیشتووە، بەداخەوە بزووتنەوەی نازیزم لۆگۆی سڤاستیكای بە ئامانجێكی زۆر خراپ بەكار هێنا، بەكارهێنانەكەی رێك بە پێچەوانەی مانای لۆگۆكە بوو، بە مانای نەتەوەی باڵای ئاریایی بەكاری هێنا.
ئەو مامۆستایەی یۆگا ئەوەشی گوتووە، راستییەكەی نەتەوەی ئاریی قەت بوونی نەبووە، وشەی ئاری لە بنەڕەتدا سانسكریتییە و چەندان مانای دژ بە یەكی هەیە، یەكێكیانی بەمانای دوژمن، شمشێر، بەڕێز و زۆر شتی تر دێت، بەڵام لە دەقە زۆر كۆنەكانی یۆگادا زیاتر بە مانای خامۆشی زەین و مامۆستای مەزن دێت.
" لە كۆندا بەم ناوچەیەیان دەگوت وڵاتی ئارییەكان، واتە وڵاتی مامۆستا مەزنەكان، ئەوانەی بە پلەی خامۆشی زەین گەیشتوون، مانای سێیەمی ئەم لۆگۆی خۆرە یانی هەموومان یەكین، واتە لە بنەڕەتدا دەچینەوە سەر یەك سەرچاوە". مەحموود شێرزاد وادەڵێت.
لە كۆتاشدا ئاماژەی بەوە داوە، هێنانەوەی ئەم لۆگۆیە هوشیارییەكی زۆری لە پشتە، بەڵام بەرزكردنەوە و پاراستن و بە مەنزڵ گەیاندنی جوامێریی و خۆنەویستی و هوشیارییەكی زۆر زیاتر و قووڵتری دەوێت.