دبیت زۆر کەس خۆ ب خودانا هزرا دەستنیشانکرنا رۆژەکێ بۆ جلوبەرگێن نیشتمانی بدانن، بەلێ هزرا دەستنیشانکرنا ڤێ رۆژێ دزڤریت بۆ گەنجەکێ باژێرێ دھۆکێ ل سالا 2009ێ کو ژێدەرێ وێ ژی ل کورتە فیلمەکێ ھاتیە.
ئەحمەد شێران، خودانێ هزرا دەستنیشانکرنا رۆژەکێ بۆ جلوبەرگێن نیشتمانی بۆ"وشە"گوت، ل سالا 2009ێ من ل ئێک ژ کەنالێن نافخۆ ل دھۆکێ وەکو وێنەگر کار دکر، پاشی هەر وێ سالێ دا، ب مەرەما دەستنیشانکرنا رۆژەکێ بۆ جلوبەرگێن کوردی مە کورتە فلمەک درۆست کر، پاشی ئەو کورتە فلمە بویە ژێدەرێ دەستنیشانکرنا رۆژەکێ بۆ جلوبەرگێن کوردی ل سەرانسەرێ هەرێما کوردستانێ.
زێدەتر گوت"مە کورتە فلم ل قوتابخانا ھەژار موکریانی ل سەنتەرێ باژێرێ دھۆکێ دروست کر و تێدا کومەکا قوتابیێن کچ و کور جلوبەرگێن کوردی کربونە بەرخۆ و دناڤ پولا قوتابخانێ رونشتبوون بێی کو ماموستایێن وان ئاگەهی ل وان بیت، پاشی ژ نیشکەکێڤە ماموستایێن وان دهێنە ژور و دەبینیت ھەموو قوتابیێن وان جلوبەرگێن کوردی کرینە بەرخۆ ، ژبەرڤێ قوتابی و ماموستا پێکڤە بڤی شێوازەی یێ جلوبەرگان دلخوش دبن، ژ وێ رۆژێ هزرا کرنا ل بەرخۆکرنا جلوبەرگێن کوردی سەرھلدا و پشکەکا زۆر یا ماموستا و قوتابیان داخوازکر کو پێدڤی یە رۆژەکا تایبەت بۆ کرنا ل بەر خۆ یا جلوبەرگێن کوردی بهێتە دەستنیشان کرن.
ب گورەی ئاخفتنێن شێرانی، پشتی کورتە فلمێ وان ل کەنالێ تێلەڤزیوونی بەلاڤبوی و ب تشتەکێ حێبەتی و گرنگ هاتە دیتن و گوت ژی، لەوا ل سالا 2011ێ ب رێیا چەند کەسان گەهشتە وەزارەتا پەروەردێ یا حکوومەتا ھەرێما کوردستانێ، داکو ب رەنگەکێ فەرمی دناڤ قوتابخانەیان دا ببیتە رۆژەکا فەرمی و ساڵانە ب کرنا ل بەر خۆ یا جلوبەرگێن کوردی و د چەند کەرنەڤالەکێن جوراوجۆ دا بهێتە ساخکرن ڤە، داکو جیلێ نوو بزانن چەوا جلوبەرگێن کوردی هاتیە دانان و چەند گرنگی خوە ھەیە.
شێران، د درێژاهیا ئاخفتنێن خۆ دا دیارکر ژی کو نوکە رۆژا جلوبەرگێن کوردی ب ناڤونیشانێن رۆژا جلوبەرگێن نیشتمانی هاتیە دانان و گوت ژی، جلوبەرگێن کوردی ئێکە ژ باشترین و جوانترین جلوبەرگیێن جیھانی و پێدڤی یە ل ئاست نێڤدەولەتی بهێتە نیاسین، ئەڤرۆ ھەموو گەلێن دنیایێ خودان جلوبەرگێن تایبەت بخوڤە نە، دڤێت لایەنێن شولەژێ یێن حکومەتا ھەرێما کوردستانێ گرنگیەکا زێدەتر ب جلوبەرگێن کوردی بدەن، هەروەسا پێدڤی یە کوردێن ھەرچوار پارچەیێن کوردستانێ ژی د ئێک رۆژێ دا جلوبەرگێن کوردی بکەنێ و رێورسمێن فەرمی بۆ بهێنە ئەنجام دان.
پاشی پەرلەمانێ کوردستانێ روژا 10-3 وەکو روژا جلوبەرگێن نیشتمان ل هەرێما کوردستانێ دایە ناساندن و سالانە ل هەموو فەرمانگەهـ و قوتابخانە و زانکو و پەیمانگەهان ئەڤ روژە ب کرنا ل بەرخۆ یا جلوبەرگێن نیشتمانی دهێتە ساخکرن.