بەهۆی زۆریی بارانی بەخوڕ و لێڵبوونی ئاو، وایكرد پێدانی ئاو بۆ ماوەی 48 سەعات رابگیرێت، بەڵام ئەمڕۆ پڕۆژەكە بەگەڕ دەخرێتەوە و ئاو دەگەڕێتەوە بۆ ماڵان.
ئەمڕۆ سێشەم 17ـی ئادار، ڕابەر حوسێن بەرێوەبەری ئاوی هەولێر، بە "وشە"ـی راگەیاند، بەردانەوەی و پێدانی ئاو لە وێستگەكانی ئاوی ئیفراز و پڕۆژەی فریاگوزاری ئاسایی بووەتەوە.
زیاتر گوتی، تا ئێوارە ئاو دەگاتەوە هاوبەشان كە بە هۆی بارانبارینی زۆر و لێڵبوونی ئاوی زێی گەورە، بەردانەوەی ئاو وەستابوو.
ئەوە لە كاتێكدایە هەولێر بۆ دابینكردنی ئاو پشت بە ئاوی ئیفراز دەبەستێت و زیاتر لە هەزار بیر داخراون، بەڵام بارانبارینی دوو رۆژی رابردوو كە 40 ملیم كەمتر لە سەعاتێك باری، وایكرد ئاستی لێڵی ئاو زیاد بكات و پێدانی ئاو رابگیرێت.